‘നീലക്കുയിൽ’ ​ഗായിക കോഴിക്കോട് പുഷ്പ അന്തരിച്ചു

പ്രശസ്ത പിന്നണി ​ഗായിക കോഴിക്കോട് പുഷ്പ അന്തരിച്ചു. 84 വയസായിരുന്നു. വ്യാഴാഴ്ച രാവിലെ പത്തിന് ചെന്നൈ കൊട്ടിവാക്കത്തെ വസതിയിൽ വെച്ചായിരുന്നു അന്ത്യം സംഭവിച്ചത്. മലയാള സിനിമയിലെ എക്കാലത്തെയും മികച്ച ചിത്രമായ നീലക്കുയിലിലെ ആ ഒരൊറ്റ ​ഗാനം മാത്രം മതി പുഷ്പയെ മലയാളികൾക്ക് ഓർത്തിരിക്കാൻ.

‘കടലാസു വഞ്ചിയേറി, കടലുംകടന്നുകേറി കളിയാടുമിളംകാറ്റിൽ ചെറുകാറ്റുപായ പാറി….’ എന്ന ഗാനമാണ് പുഷ്പയെ പ്രശസ്തയാക്കിയത്. തന്റെ പതിന്നാലാം വയസിലായിരുന്നു പുഷ്പ പി. ഭാസ്കരൻ എഴുതി കെ. രാഘവൻ സംഗീതംപകർന്ന ഈ ​ഗാനം ആലപിക്കുന്നത്. ‘നീലക്കുയിലി’നു ശേഷം ഒട്ടേറെ അവസരങ്ങൾ തേടിയെത്തിയെങ്കിലും അതിനിടയിൽ പുഷ്പ വിവാഹിതായി.

1950-ൽ കോഴിക്കോട് ആകാശവാണിയിൽ പുഷ്പയുടെ ‘സുലളിത സുമധുര’ എന്ന ലളിതഗാനാലാപനം കേട്ടാണ് പി. ഭാസ്കരൻ നീലക്കുയിലിൽ പാടാൻ വിളിക്കുന്നത്. 1953-ൽ ‘ലോകനീതി’ എന്ന സിനിമയിൽ അഭയദേവ് – ദക്ഷിണാമൂർത്തി ടീമിനുവേണ്ടി രണ്ടു പാട്ടുകൾ പാടിയെങ്കിലും ശ്രദ്ധനേടിയില്ല.

മൂത്തസഹോദരിമാരായ തുളസിയും കൗസല്യയും കാലിക്കറ്റ് സിസ്റ്റേഴ്‌സ് എന്നപേരിൽ കച്ചേരികൾ അവതരിപ്പിച്ചിരുന്നു. അവരിൽ നിന്നാണ് പുഷ്പ സം​ഗീതം പഠിച്ചത്. തലശ്ശേരിയിലാണ് പുഷ്പയുടെ തറവാട്. ഭർത്താവ് കെ.വി. സുകുരാജൻ നേരത്തെ മരിച്ചു. മക്കൾ: പരേതനായ പുഷ്പരാജ് വാചാലി, സൂര്യ, സൈറ, മരുമക്കൾ: രാജി വാചാലി, രാംദേവ്, വിനോദ്. സംസ്കാരം വെള്ളിയാഴ്ച രാവിലെ പത്തിന് ചെന്നൈ ബസന്ത്‌നഗർ ശ്മശാനത്തിൽ.