ഗായകൻ ജാക്ക് ജോൺസ് അന്തരിച്ചു

‘ദി ലവ് ബോട്ട്’ എന്ന ടെലിവിഷൻ ഷോയിലെ തീം സോങ്ങിലൂടെ പ്രശസ്തനായ ഗായകൻ ജാക്ക് ജോൺസ് അന്തരിച്ചു. 86 വയസായിരുന്നു. ബുധനാഴ്ച കാലിഫോർണിയയിലായിരുന്നു അന്ത്യം സംഭവിച്ചത്. കഴി‍ഞ്ഞ രണ്ട് വർഷമായി രക്താർബുദബാധിതനായിരുന്നു അദ്ദേഹം.

1938 ൽ ലോസ് ഏഞ്ചൽസിലാണ് ജാക്ക് ജനിച്ചത്. കലാ കുടുംബത്തിൽ ആയിരുന്നു അദ്ദേഹത്തിന്റെ ജനനം. താരങ്ങളായ അലൻ ജോൺസും ഐറിൻ ഹാർവിയും ആയിരുന്നു അച്ഛനും അമ്മയും. അദ്ദേഹത്തിന്റെ പിതാവ് അലൻ ജോൺസ് നടനെന്നതിനേക്കാളുപരി മികച്ചൊരു ​ഗായകനുമായിരുന്നു. അച്ഛന്റെയും അമ്മയുടെയും പാത പിന്തുടർന്ന ജാക്ക് ​ഗായകനായും നടനായും തിളങ്ങി.

1982-ൽ പുറത്തിറങ്ങിയ എയർപ്ലെയിൻ 2: ദി സീക്വൽ, 2013-ലെ അമേരിക്കൻ ഹസിൽ എന്നീ ചിത്രങ്ങളിൽ ജാക്ക് അഭിനയിച്ചിട്ടുണ്ട്. ലേഡി,”, “ദി റേസ് ഈസ് ഓൺ,”, “ഡിയർ ഹാർട്ട്”, “ദി ഇംപോസിബിൾ ഡ്രീം (ദി ക്വസ്റ്റ്) എന്നിവ അദ്ദേഹത്തിന്റെ പ്രശസ്ത ​ഗാനങ്ങളിൽ ചിലതാണ്. 1960 കളിൽ “ലോലിപോപ്സ് ആൻഡ് റോസസ്”, “വൈവ്സ് ആൻഡ് ലവേഴ്സ്” എന്നിവയ്ക്ക് രണ്ട് ​ഗ്രാമി പുരസ്കാരങ്ങളും ജാക്കിനെ തേടിയെത്തി.

നിരവധി മനോഹര ​ഗാനങ്ങൾ അദ്ദേഹത്തിന്റേതായി ഉണ്ടെങ്കിലും 1980 കളിലെ ‘ദി ലവ് ബോട്ട്’ എന്ന തീം സോങാണ് ഏറെ പ്രശസ്തിയിലേയ്ക്ക് ഉയർത്തിയതും ആരാധകരെ നേടിക്കൊടുത്തതും. ഏഴ് പതിറ്റാണ്ടായ തന്റെ കരിയറിൽ അദ്ദേഹം 50 ലധികം ആൽബങ്ങൾ പുറത്തിറക്കുകയും നിരവധി ​ഗാനങ്ങൾ ആലപിക്കുകയും ചെയ്തിട്ടുണ്ട്. തന്റെ എൺപതുകളിലും തന്റെ കരിയറിൽ സജീവമായിരുന്നു അദ്ദേഹം.