Malayalam
‘ഇത് ഗംഭീരമായിട്ടുണ്ട്, ഉള്ളൊഴുക്കിനായി കാത്തിരിക്കുന്നുവെന്ന് സാമന്ത; നടിയുടെ സ്റ്റോറി പങ്കുവെച്ച് പാര്വതി
‘ഇത് ഗംഭീരമായിട്ടുണ്ട്, ഉള്ളൊഴുക്കിനായി കാത്തിരിക്കുന്നുവെന്ന് സാമന്ത; നടിയുടെ സ്റ്റോറി പങ്കുവെച്ച് പാര്വതി
ഉര്വശിയും പാര്വതി തിരുവോത്തും പ്രധാനവേഷത്തിലെത്തുന്ന ക്രിസ്റ്റോ ടോമി ചിത്രമാണ് ഉള്ളൊഴുക്ക്. ഈ ചിത്രം കാണാന് കാത്തിരിക്കുവാണെന്ന് അറിയിച്ചിരിക്കുകയാണ് സാമന്ത റൂത്ത്പ്രഭു. ‘ഇത് ഗംഭീരമായിട്ടുണ്ട്, കാത്തിരിക്കുന്നു’ എന്നാണ് സാമന്ത കുറിച്ചത്. ഇന്സ്റ്റാഗ്രാം സ്റ്റോറിയിലൂടെയാണ് താരം ഈ സിനിമ കാണാനുള്ള ആകാംഷ പങ്കുവെച്ചത്.
പിന്നാലെ പാര്വതിയും നടിയുടെ സ്റ്റോറി പങ്കുവെച്ചിട്ടുണ്ട്. കേരളത്തെ നടുക്കിയ കൂടത്തായി കൂട്ടക്കൊലയെ സംബന്ധിച്ച് ഏറെ ശ്രദ്ധ നേടിയ ‘കറി ആന്ഡ് സയനൈഡ്’ എന്ന നെറ്റ്ഫ്ലിക്സ് ഡോക്യുമെന്ററി സംവിധാനം ചെയ്ത സംവിധായകനാണ് ക്രിസ്റ്റോ ടോമി. അദ്ദേഹത്തിന്റെ ആദ്യ ഫീച്ചര് ഫിലിമാണ് ഉള്ളൊഴുക്ക്. സുഷിന് ശ്യാമാണ് ചിത്രത്തിന്റെ സംഗീതസംവിധാനം. ജൂണ് 21നാണ് ചിത്രം തിയേറ്ററുകളിലെത്തുക.
ഉര്വശി, പാര്വതി തിരുവോത്ത് എന്നിവരെക്കൂടാതെ അലന്സിയര്, പ്രശാന്ത് മുരളി, അര്ജുന് രാധാകൃഷ്ണന്, ജയാ കുറുപ്പ് തുടങ്ങിയവരും പ്രധാന വേഷത്തിലെത്തുന്നുണ്ട്. 2018ല് ദേശീയതലത്തില് നടന്ന ‘സിനിസ്ഥാന് ഇന്ത്യ’ തിരക്കഥ മത്സരത്തില് 25 ലക്ഷം രൂപയുടെ ഒന്നാം സ്ഥാനം നേടിയ ക്രിസ്റ്റോ ടോമിയുടെ തിരക്കഥയാണ് ഇപ്പോള് ‘ഉള്ളൊഴുക്ക് എന്ന സിനിമയാകുന്നത്.
ആമിര് ഖാന്, രാജ് കുമാര് ഹിറാനി എന്നിവര് അടങ്ങുന്ന ജൂറിയുടെ നേതൃത്വത്തില് ആയിരുന്നു മത്സരം. ഇതേ മത്സരത്തില് രണ്ടാം സ്ഥാനം ലഭിച്ചത് ആമിര് ഖാന്റെ നിര്മ്മാണത്തില് ഈയടുത്ത് പുറത്തിറങ്ങിയ ബിപ്ലവ് ഗോസ്വാമിയുടെ ‘ലാപതാ ലേഡീസ്’ എന്ന തിരക്കഥയ്ക്കായിരുന്നു.
റോണി സ്ക്രൂവാലയും ഹണി ട്രെഹാനും അഭിഷേക് ചൗബേയും ചേര്ന്ന് ആര് എസ് വി പിയുടെയും മക്ഗഫിന് പിക്ചേഴ്സിന്റെയും ബാനറുകളില് നിര്മ്മിക്കുന്ന ഉള്ളൊഴുക്കിന്റെ സഹനിര്മ്മാണം നിര്വഹിക്കുന്നത് റെവറി എന്റര്ടെയ്ന്മെന്റ്സിന്റെ ബാനറില് സഞ്ജീവ് കുമാര് നായരാണ്. സത്യജിത്ത് റായ് ഫിലിം ഇന്സ്റ്റിറ്റിയൂട്ടിലെ പൂര്വവിദ്യാര്ഥി കൂടിയാണ് ക്രിസ്റ്റോ ടോമി.
