ഇതും ചെയ്യും ഇതിനപ്പുറവും ചെയ്യും; ഓണനാളിൽ മലയാളികൾക്കായി സച്ചിൻ ചെയ്തത് കണ്ടോ?

മലയാളികൾക്ക് ഓണാശംസ മലയാളത്തിൽ നേർന്ന് സച്ചിൻ തെണ്ടുൽക്കർ. തന്റെ ഔദ്യോഗിക ട്വിറ്റർ പേജിലാണ് സച്ചിൻ മലയാളത്തിൽ ട്വീറ്റ് ചെയ്തത്. ‘ഐശ്വര്യത്തിന്റെയും സമ്പൽസമൃദ്ധിയുടെയും ഈ ചിങ്ങപ്പുലരിയിൽ ഏവർക്കും ഹൃദയം നിറഞ്ഞ ഓണാശംസകൾ’ ഇതായിരുന്നു സച്ചിന്റെ ട്വീറ്റ്.

മലയാളികൾ ഈ ആശംസ ഏറ്റെടുത്തെങ്കിലും ഈ ട്വീറ്റ് കണ്ട് മലയാളികളല്ലാത്തവർ ഞെട്ടി. കാരണം മറ്റൊന്നുമല്ല, ഈ ട്വീറ്റ് ഇംഗ്ലീഷിലേക്ക് തർജമ ചെയ്തപ്പോൾ കിട്ടിയ അർഥം രസകരമായിരുന്നു. അന്യഭാഷ ട്വീറ്റുകൾ ഇംഗ്ലീഷിലേക്ക് തർജമ ചെയ്യാൻ ട്വിറ്റർ തന്നെ നൽകുന്ന ”ട്രാൻസ്ലേറ്റ് ട്വീറ്റ്’ എന്ന ഓപ്ഷൻ ഉപയോഗിക്കുമ്പോൾ വരുന്ന തർജമയാണ് എല്ലാവരേയും അമ്പരപ്പിച്ചത്. Who cares – Happy Onam to all. (‘ഇതെല്ലാം ആരു ഗൗനിക്കുന്നു, എല്ലാവർക്കും ഓണാശംസകൾ’) എന്നായിരുന്നു തർജമ.

ഇതോടെ നിരവധി പേരാണ് സച്ചിന്റെ ഈ ട്വീറ്റ് പങ്കുവെച്ചത്.