അവതാരകയെ പിന്നിലിരുത്തി ഹെൽമറ്റ് ധരിക്കാതെ ബൈക്കോടിച്ച് അഭിമുഖം; പ്രശാന്തിന് പിഴയീടാക്കി പോലീസ്, പിന്നാലെ രം​ഗത്തെത്തി നടൻ

നിരവധി ആരാധകരുള്ള തമിഴ് നടനാണ് പ്രശാന്ത്. ഇപ്പോഴിതാ തന്റെ പുതിയ ചിത്രം അന്ധ​ഗന്റെ റിലീസിന് മുന്നേ വിവാദത്തിൽപ്പെട്ടിരിക്കുകയാണ് നടൻ. സിനിമയുടെ പ്രമോഷന്റെ ഭാ​ഗമായി നടത്തിയ അഭിമുഖത്തിന്റെ പേരിലാണ് നടൻ ഇപ്പോൾ വെട്ടിലായിരിക്കുന്നത്.

വ്യത്യസ്തമായ രീതിയിലുള്ള ഒരു അഭിമുഖമായിരുന്നു നടൻ നൽകിയത്. ബൈക്കോടിച്ചുകൊണ്ടുള്ള ഇന്റർവ്യൂ ആണ് താരം നൽകിയത്. തമിഴ് യൂട്യൂബ് ചാനലായ ​ഗലാട്ടാ പ്ലസിന് ആയിരുന്നു പ്രശാന്ത് അഭിമുഖം നൽകിയത്. അവതാരക പിന്നിലിരുത്തി ഹെൽമറ്റ് ഇല്ലാതെ ബൈക്ക് ഓടിച്ചായിരുന്നു ഇന്റർവ്യൂ.

ദ്യമായി ബൈക്ക് ഓടിക്കാൻ പഠിച്ചതിനേക്കുറിച്ചും മറ്റുമാണ് അഭിമുഖത്തിൽ താരം പറയുന്നത്. വീഡിയോ വലിയ രീതിയിൽ വൈറലായതോടെ ചെന്നൈ ട്രാഫിക് പോലീസിന്റെ ശ്രദ്ധയിൽപ്പെടുകയായിരുന്നു ഈ വീഡിയോ. ഈ വിഷയം ​ഗൗരവമായെടുത്ത ചെന്നൈ ട്രാഫിക് പോലീസ് പ്രശാന്തിനും അവതാരകയ്ക്കുമെതിരെ ഹെൽമറ്റ് ധരിക്കാത്തതിന് 2000 രൂപ പിഴീടാക്കി.

പിന്നാലെ നടനെതിരെ കടുത്ത രീതിയിലുള്ള വിമർശനങ്ങളും വന്നിരുന്നു. വൈകാതെ വിശദീകരണവുമായി പ്രശാന്ത് തന്നെ രം​ഗത്തെത്തിയിരുന്നു. ഞങ്ങൾ ബൈക്കിൽ ഒരു അഭിമുഖം ചെയ്തിരുന്നു. ഞങ്ങൾ രണ്ടാളും ഹെൽമറ്റ് ധരിക്കാതിരുന്നത് നിങ്ങൾ കണ്ടിരിക്കും. അത് ആ ഷോയ്ക്കുവേണ്ടി മാത്രമായിരുന്നു.

പക്ഷേ നിങ്ങൾ ഒരിക്കലും ഇങ്ങനെ ചെയ്യരുത്. നിങ്ങൾ വാഹനമോടുക്കുമ്പോൾ തീർച്ചയായും ഹെൽമറ്റ് ധരിക്കണം. ഞാനെപ്പോഴും പറയുന്ന കാര്യമാണിത്. പക്ഷേ അഭിമുഖത്തിനിടെ ഹെൽമറ്റ് ധരിച്ചാൽ ഞങ്ങൾ പറയുന്നത് നിങ്ങൾക്ക് കേൾക്കാൻ കഴിയില്ല. ആ കാരണത്താലാണ് ഹെൽമറ്റ് ഒഴിവാക്കേണ്ടി വന്നത്. തീർച്ചയായും സുരക്ഷയ്ക്കാണ് പ്രാധാന്യം നൽകേണ്ടത്. ഹെൽമറ്റ് ധരിക്കൂ, സുരക്ഷിതരാവൂ എന്നും പ്രശാന്ത് പറഞ്ഞു.

അതേസമയം, ഓ​ഗസ്റ്റ് 15-ന് റിലീസ് ചെയ്യാനിരുന്ന അന്ധ​ഗൻ മാസം 9-നാണ് തിയേറ്ററുകളിലെത്തുന്നത്. റിലീസ് ചെയ്യുന്നത്. ബോളിവുഡ് ചിത്രം അന്ധാധുന്റെ തമിഴ് റീമേക്ക് ആണ് ചിത്രം. പ്രിയ ആനന്ദ്, സിമ്രാൻ, സമുദ്രക്കനി എന്നിവരാണ് മറ്റുപ്രധാന വേഷങ്ങൾ കൈകാര്യം ചെയ്യുന്നത്. വെങ്കട്ട് പ്രഭു സംവിധാനംചെയ്ത് വിജയ് നായകനാവുന്ന ദി ​ഗോട്ട് ആണ് പ്രശാന്തിന്റേതായി അണിയറയിൽ ഒരുങ്ങുന്ന മറ്റൊരു ചിത്രം.