കുടുംബത്തിലെ ചുമതലകൾ നിറവേറ്റുന്നതിനൊപ്പം അക്കാദമിക് രംഗത്ത് തുടരാൻ ആഗ്രഹിക്കുന്നവർക്ക് പ്രചോദനം; സിം​ഗപ്പൂർ യൂണിവേഴ്സിറ്റിയിൽനിന്ന് ബിരുദമെടുത്ത് പവൻ കല്യാണിന്റെ ഭാര്യ

നിരവധി ആരാധകരുള്ള തെലുങ്ക് സൂപ്പർതാരമാണ് പവൻ കല്യാൺ. നടനെന്നതിനേക്കാളുപരി ആന്ധ്ര ഡെപ്യൂട്ടി മുഖ്യമന്ത്രിയുമാണ് അദ്ദേഹം. ഇപ്പോഴിതാ പവൻ കല്യാണിന്റെ ഭാര്യ അന്ന ലെസ്നേവ ബിരുദമെടുത്ത സന്തോഷം പങ്കുവെച്ചിരിക്കുകയാണ് അദ്ദേഹം. സിം​ഗപ്പുരിലെ നാഷണൽ യൂണിവേഴ്സിറ്റിയിൽ നിന്നാണ് അന്ന ലെസ്നേവ ബിരുദമെടുത്തത്.

സിം​ഗപ്പുരിൽ നടന്ന ബിരുദദാനച്ചടങ്ങിന്റെ വീഡിയോയും അദ്ദേഹം പങ്കുവെച്ചിട്ടുണ്ട്. അന്ന കൊനിഡേല എന്നാണ് ചടങ്ങിലെ വീഡിയോ വാളിൽ അന്നയുടെ പേര് പ്രദർശിപ്പിച്ചിരിക്കുന്നത്. പിന്നാലെ അന്നയെ അഭിനന്ദിച്ച് ആന്ധ്രാ മുഖ്യമന്ത്രി ചന്ദ്രബാബു നായിഡു രം​ഗത്തെത്തിയിരുന്നു. അന്നയുടെ നേട്ടം ശ്രദ്ധേയമാണ്.

കുടുംബത്തിലെ ചുമതലകൾ നിറവേറ്റുന്നതിനൊപ്പം അക്കാദമിക് രംഗത്ത് തുടരാൻ ആഗ്രഹിക്കുന്ന എല്ലാവർക്കും, പ്രത്യേകിച്ച് ആന്ധ്രാപ്രദേശിലെ സഹോദരിമാർക്കും പെൺമക്കൾക്കും അന്നയുടെ ബിരുദം ഒരു പ്രചോദനമായിത്തീരുമെന്നും മുഖ്യമന്ത്രി പറഞ്ഞു.

2013-ലാണ് പവൻ കല്യാണും അന്നയും വിവാഹിതരായത്. പവൻ കല്യാണിന്റെ മൂന്നാം വിവാഹമായിരുന്നു ഇത്. പൊലേന, മാർക് എന്നിങ്ങനെ രണ്ടുമക്കളുമുണ്ടിവർക്ക്. രാഷ്ട്രീയത്താടൊപ്പെ സിനിമയിലും സജീവമാണ് പവൻ കല്യാൺ. മൂന്ന് ചിത്രങ്ങളാണ് അണിയറയിൽ ഒരുങ്ങുന്നത്. ഒ.ജി, ഉസ്താദ് ഭ​ഗത് സിം​ഗ്, ഹരി ഹര വീര മല്ലു: പാർട്ട് 1 -സ്വോർഡ് വേഴ്സസ് സ്പിരിറ്റ് എന്നിവയാണ് ചിത്രങ്ങൾ.

2024-ലെ പൊതു തിരഞ്ഞെടുപ്പിൽ പവൻ കല്യാണിന്റെ യാത്ര വിജയത്തിൽ നിർണായക പങ്കുവഹിച്ചെന്നാണ് വിലയിരുത്തൽ. ചന്ദ്രബാബു നായിഡുവിന്റെ ടി.ഡി.പി- ബി.ജെ.പി. സഖ്യത്തിൽ 21 സീറ്റിൽ നിയമസഭയിലേക്ക് മത്സരിച്ച ജനസേന മുഴുവൻ സീറ്റും വിജയിച്ചു. ലോക്‌സഭയിലേക്ക് മത്സരിച്ച രണ്ടുസീറ്റും പാർട്ടി സ്വന്തമാക്കിയിരുന്നു.