ഞാൻ ചെയ്ത ​ഗാനത്തിലെ വരികളോ അറേഞ്ച്മെന്റോ മിക്സോ അല്ല ഇപ്പോൾ പുറത്തെത്തിയ ​ഗാനത്തിലുള്ളത്; ആരോപണവുമായി സം​ഗീത സംവിധായകൻ സന്തോഷ് നാരായണൻ

നിരവധി ആരാധകരുള്ള തമിഴ് താരമാണ് പ്രശാന്ത്. ഇപ്പോൾ പ്രശാന്ത് നായകനായി എത്തുന്ന പുതിയ ചിത്രം അന്ധാ​ഗൻ തിയേറ്ററുകളിലേയ്ക്ക് എത്താനിരിക്കുകയാണ്. കഴിഞ്ഞ ദിവസമായിരുന്നു ചിത്രത്തിന്റെ ഓഡിയോ ലോഞ്ച്. ചെന്നൈയിൽ വെച്ചായിരുന്നു ചടങ്ങ്. ചടങ്ങിൽ മുഖ്യാതിഥിയായി നടൻ വിജയും എത്തിയിരുന്നു.

എന്നാൽ ഇപ്പോൾ ചിത്രത്തിന്റെ അണിയറപ്രവർത്തകർക്കെതിരെ രം​ഗത്തെത്തിയിരിക്കുകയാണ് സം​ഗീത സംവിധായകൻ സന്തോഷ് നാരായണൻ. അണിയറപ്രവർത്തകർക്കെതിരെ ​ഗുരുതര ആരോപണവുമായാണ് സം​ഗീത സംവിധായകൻ രം​ഗത്തെത്തിയിരിക്കുന്നത്. താൻ ചെയ്ത പാട്ടിൽ സിനിമയുടെ നിർമാതാക്കളും സോണി മ്യൂസിക്കും തിരിമറികൾ നടത്തിയെന്നാണ് സന്തോഷ് നാരായണൻ പറയുന്നത്.

ഔദ്യോ​ഗിക എക്സ് അക്കൗണ്ടിൽ സോണി മ്യൂസിക് പോസ്റ്റ് ചെയ്ത പാട്ടിന്റെ ലിങ്ക് ഷെയർ ചെയ്തുകൊണ്ടാണ് രൂക്ഷ വിമർശനവുമായി സന്തോഷ് നാരായണൻ രം​ഗത്തെത്തിയത്. ചരിത്രത്തിലാദ്യമായി ഒരു ഓഡിയോ ലേബൽ കാഴചയില്ലാത്ത കഥാപാത്രത്തെ അവതരിപ്പിച്ചിരിക്കുന്നു- എന്നാണ് സന്തോഷ് നാരായണൻ എക്സിൽ കുറിച്ചത്.

സിനിമയിലെ പ്രശാന്തിന്റെ കഥാപാത്രം കാഴ്ചശക്തിയില്ലാത്തയാളാണ്. ഇതുകൂടി സൂചിപ്പിച്ചുകൊണ്ടാണ് സന്തോഷ് നാരായണന്റെ പരിഹാസം. അന്ധാ​ഗൻ ആന്തം എന്ന പേരിൽ ഇപ്പോഴെത്തിയിരിക്കുന്നത് ഞാൻ സംഗീതം നൽകിയ ഗാനമല്ല, കൂടാതെ ഞാൻ ചെയ്ത ​ഗാനത്തിലെ വരികളോ അറേഞ്ച്മെന്റോ മിക്സോ അല്ല ഇപ്പോൾ പുറത്തെത്തിയ ​ഗാനത്തിലുള്ളത്- എന്നും സന്തോഷ് നാരായണൻ കുറിച്ചു.

സം​ഗീത സംവിധായകന്റെ പേരിന്റെ സ്ഥാനത്ത് സന്തോഷ് നാരായണന്റെ പേരുതന്നെയാണ് നിർമാതാക്കൾ വെച്ചിരിക്കുന്നത്. കഴിഞ്ഞദിവസം ചെന്നൈയിൽ നടന്ന ചടങ്ങിൽ നടൻ വിജയ് ആണ് ​ഗാനം പുറത്തിറക്കിയത്. ഈ ചടങ്ങിൽ സന്തോഷ് നാരായണൻ പങ്കെടുത്തിരുന്നില്ല. ഉമാ ദേവി, ഏകാദശി എന്നിവരാണ് വരികളെഴുതിയത്. അനിരുദ്ധും നടൻ വിജയ് സേതുപതിയും ചേർന്നാണ് ​ഗാനം ആലപിച്ചത്.

2018-ൽ പുറത്തിറങ്ങിയ അന്ധാധുൻ എന്ന ചിത്രത്തിന്റെ തമിഴ് റീമേക്കാണ് അന്ധാ​ഗൻ. 2022-ൽ ചിത്രീകരണം പൂർത്തിയാക്കിയ ചിത്രം സാങ്കേതികകാരണങ്ങളാൽ റിലീസ് നീണ്ടുപോവുകയായിരുന്നു. പ്രശാന്തിന്റെ പിതാവും നടനുമായ ത്യാ​ഗരാജനാണ് സംവിധാനം. പ്രിയാ ആനന്ദ്, സിമ്രാൻ, കാർത്തിക്, സമുദ്രക്കനി, ഉർവശി, യോ​ഗി ബാബു, കെ.എസ്. രവികുമാർ, വനിതാ വിജയകുമാർ, അന്തരിച്ച നടൻ മനോബാല എന്നിവരാണ് മുഖ്യവേഷങ്ങളിൽ എത്തുന്നത്.