എന്റെ അമ്മയെ നോക്കി പഠിച്ചാണ് ഞാന്‍ ആ കഥാപത്രം ചെയ്തത്; മീര വാസുദേവന്‍ പറയുന്നു
മോഹന്‍ലാല്‍ നായകനായ തന്മാത്ര എന്ന ഒറ്റ സിനിമ കൊണ്ട് പ്രേക്ഷക മനസ്സുകളില്‍ സ്ഥാനം നേടിയ താരമാണ് മീര. മോഹന്‍ലാല്‍ അവതരിപ്പിച്ച രമേശന്‍ നായരുടെ ഭാര്യയായിരുന്നു മീരയുടെ കഥാപാത്രം. ചെറിയൊരു ഇടവേളയ്ക്കു ശേഷമാണ് സിനിമയിൽ നിന്ന് സീരിയലിലേക്കുള്ള മീരയുടെ ചുവടുവെയ്പ്.
മീര വാസുദേവന്‍ ഇപ്പോള്‍ സുമിത്ര എന്ന കഥാപാത്രമായി പ്രേക്ഷകര്‍ക്ക് മുന്നില്‍ ജീവിയ്ക്കുകയാണ്.
അത്രയധികം തന്മയത്വത്തോടെയാണ് തന്മാത്രയിൽ മോഹന്‍ലാലിന്റെ ഭാര്യയായ ലേഖ എന്ന കഥാപാത്രത്തെ മീര ചെയ്തത്. അതിന് തന്നെ സഹായിച്ചത് അമ്മയാണ് എന്ന് മീര പറയുന്നു.
ആ കഥാപാത്രത്തെ കുറിച്ച് വളരെ വിശദമായ ഒരു ചിത്രം ബ്ലെസ്സി സര്‍ എനിക്ക് നല്‍കിയിരുന്നു. എന്റേതായ രീതിയില്‍ ചെറിയ നിരീക്ഷണം നടത്തി അത് പൂര്‍ണമാക്കുക എന്നതായിരുന്നു എന്റെ ഉത്തരവാദിത്വം. അതിന് വേണ്ടി ഞാന്‍ ചെയ്തത് എന്റെ അമ്മയെ നിരീക്ഷിക്കുക എന്നതാണ്. അമ്മയ്ക്ക് ഞങ്ങള്‍ രണ്ട് കുട്ടികളാണ്. ഞങ്ങളുടെ കാര്യങ്ങള്‍ നോക്കുന്നതിനൊപ്പം അച്ഛനോട് അമ്മ എങ്ങിനെയാണ് ഇടപഴകുന്നത് എന്ന് നോക്കി പഠിച്ചാണ് ആ കഥാപാത്രം ചെയ്തത്.
പിന്നെ എനിക്ക് നല്ലൊരു സപ്പോര്‍ട്ടിങ് ടീം ഉണ്ടായിരുന്നു. ബ്ലെസ്സി സാറിന്റെ നിര്‍ദ്ദേശങ്ങളും മറ്റ് ക്രൂ മെമ്പേഴ്‌സും ലാല്‍ സാറും എല്ലാം എന്നെ സഹായിച്ചു. എന്റെ ജോലി വളരെ എളുപ്പമാക്കി തന്നു. എന്റെ ഉള്ളിലെ സംശയങ്ങള്‍ ഞാന്‍ നിരന്തരം ചോദിച്ചുകൊണ്ടേയിരുന്നു. അതുകൊണ്ടൊക്കെയാണ് ആ കഥാപാത്രം എനിക്ക് അത്രയും നല്ല രീതിയില്‍ ചെയ്യാന്‍ സാധിച്ചത്.
ഇപ്പോള്‍ സുമിത്ര എന്ന കഥാപാത്രത്തെ കുറിച്ച് ആണെങ്കിലും ഞാന്‍ നിരന്തരം സംശയങ്ങള്‍ ചോദിച്ചുകൊണ്ടിരിയ്ക്കും. അവളുടെ മൂഡ് എങ്ങിനെയാണ്, എന്തുകൊണ്ടാണ് ഇപ്പോള്‍ അവള്‍ക്ക് ദേഷ്യം വന്നത്, എന്തുകൊണ്ടാണ് അവള്‍ മൗനം പാലിക്കുന്നത് എന്നിങ്ങനെയുള്ള എന്റെ ചോദ്യങ്ങള്‍ക്ക് എല്ലാം സംവിധായകനും സ്‌ക്രിപ്റ്റ് റൈറ്ററും കൃത്യമായ മറുപടി നല്‍കും. അത് അനുസരിച്ചാണ് ആ കഥാപാത്രം ചെയ്യുന്നത്.
ഏതൊരു റോള്‍ എടുക്കുമ്പോഴും ആദ്യം ചിന്തിയ്ക്കുന്നത് എന്നെ കൊണ്ട് അതിന് സാധിയ്ക്കുമോ എന്നാണ്. എനിക്ക് പറ്റില്ല എന്ന് തോന്നിയാല്‍ ഒരിക്കലും അതിന് വേണ്ടി മറ്റൊരാളുടെ സമയവും പണവും ഞാന്‍ നശിപ്പിക്കില്ല. എനിക്ക് പറ്റും എന്ന് തോന്നിയാല്‍ കൃഷ്ണ ഭഗവാനെ ഏല്‍പിച്ച് ആ പ്രൊജക്ടിലേക്ക് കടക്കും. ഏതൊരു കഥാപാത്രമായി മാറുമ്പോഴും കൃത്യമായ ധാരണ അതിനെ കുറിച്ച് ഉണ്ടായിരിക്കണം എന്ന നിര്‍ബന്ധം എനിക്കുണ്ട്- മീര വാസുദേവന്‍ പറഞ്ഞു
