നിങ്ങളായിരിക്കുന്നതിനു നന്ദി; അജിത്തിനൊപ്പമുള്ള ചിത്രം പങ്കുവെച്ച് മഞ്ജു വാര്യർ

തന്റെ രണ്ടാം വരവിൽ തമിഴിലും തിളങ്ങി നിൽക്കുകയാണ് നടി മഞ്ജു വാര്യർ. ബുധനാഴ്ചയാണ് മഞ്ജു വാര്യരുടെ രണ്ടാമത്തെ തമിഴ് ചിത്രമായ ‘തുനിവ്’ തിയേറ്ററുകളിലെത്തിയത്. പൊങ്കൽ ചിത്രമായി എത്തിയ തുനിവിൽ അജിത് ആണ് നായകൻ. അജിത്തിനൊപ്പമുള്ള ഷൂട്ടിംഗ് അനുഭവങ്ങൾ മഞ്ജു അഭിമുഖങ്ങളിലായി പങ്കുവെച്ചിട്ടുണ്ട്. മഞ്ജുവിന്റെ ചിത്രത്തിലെ അഭിനയവും മികച്ചതായിരുന്നുവെന്നാണ് പ്രേക്ഷകരുടെ അഭിപ്രായം. ആക്ഷൻ രംഗങ്ങളിലും താരം തിളങ്ങിയിരുന്നു. ഇപ്പോഴിത അജിത്തിനൊപ്പമുള്ള മനോഹരമായ ചിത്രങ്ങൾ പങ്കുവച്ചിരിക്കുകയാണ് മഞ്ജു. ഒപ്പം അദ്ദേഹത്തോട് താരം നന്ദിയും പറഞ്ഞിട്ടുണ്ട്.

അജിത്തിനൊപ്പമുള്ള ഏതാനും ചിത്രങ്ങൾ ഷെയർ ചെയ്യുകയാണ് മഞ്ജു ഇപ്പോൾ. “നിങ്ങളായിരിക്കുന്നതിനു നന്ദി,” എന്നാണ് ചിത്രങ്ങൾക്ക് മഞ്ജു ക്യാപ്ഷൻ നൽകിയിരിക്കുന്നത്.

തുനിവ് ചിത്രീകരണത്തിനിടെ അജിത്തിനും മറ്റ് അണിയറപ്രവർത്തകർക്കുമൊപ്പം ലഡാക്കിലേക്ക് ബൈക്ക് യാത്രയും നടത്തിയിരുന്നു മഞ്ജു. അജിത്ത് സാർ തന്നെ ബൈക്ക് ട്രിപ്പിന് വിളിച്ചപ്പോൾ നല്ല സന്തോഷം തോന്നിയെന്നും മഞ്ജു പറഞ്ഞിരുന്നു. ഒരു ദിവസം അദ്ദേഹം വന്ന് ട്രിപ്പ് പോകുന്ന കാര്യം എന്നോട് പറഞ്ഞു. ഞങ്ങൾക്കൊപ്പം വരുന്നുണ്ടോയെന്നും ചോദിച്ചു. വെറുതെ ചോദിച്ചതാണെന്നാണ് ഞാൻ വിചാരിച്ചത്. പക്ഷേ ബൈക്ക് റെഡിയായപ്പോൾ സാർ വന്ന് ഈ ദിവസം പോകാമെന്നും പറഞ്ഞു- മഞ്ജു വാര്യർ പറഞ്ഞു.

തനിക്ക് ചിത്രത്തിലെ വേഷം വളരെ ചലഞ്ചിംഗ് ആയിരുന്നുവെന്ന് മഞ്ജു ഒരഭിമുഖത്തിൽ പറഞ്ഞിരുന്നു. സ്റ്റണ്ട് മാസ്റ്ററോടൊക്കെ ചോദിച്ച് മനസിലാക്കിയാണ് എല്ലാം ചെയ്തിരുന്നത്. എല്ലാവരും നല്ല സപ്പോർട്ടായിരുന്നുവെന്നും താരം വെളിപ്പെടുത്തിയിരുന്നു. അജിത്തിൽ നിന്ന് നമ്മൾ കണ്ടു പഠിക്കേണ്ട ചില കാര്യങ്ങളുണ്ട്. ഇങ്ങനെയൊക്കെ പെരുമാറുമോ എന്ന് നമുക്ക് തോന്നിപ്പോവുന്ന തരത്തിലുള്ള പെരുമാറ്റമാണ്. എല്ലാവരോടും അദ്ദേഹം അങ്ങനെയാണ്. സെറ്റിൽ ജൂനിയര്‍ ആർട്ടിസ്റ്റ് പോലും സേഫായിരിക്കണം എന്ന് അദ്ദേഹം ഉറപ്പ് വരുത്താറുണ്ടെന്നും മഞ്ജു അഭിമുഖങ്ങളിൽ പറഞ്ഞിരുന്നു.

വിജയ് ചിത്രം വാരിസിനൊപ്പമാണ് തുനിവ് തീയേറ്ററുകളിലെത്തിയത്. ആദ്യ ദിനം തന്നെ 26 കോടി രൂപയോളമാണ് തുനിവ് നേടിയത്. മുൻപ് പുറത്തിറങ്ങിയ അജിത്തിന്റെ വലിമൈ ആദ്യ ദിനത്തിൽ 28 കോടി നേടിയിരുന്നു. രണ്ടാം ദിനത്തിൽ തമിഴ്നാട്ടിൽ നിന്ന് മാത്രം 14 കോടിയ്ക്ക് മുകളിൽ തുനിവ് നേടിയിരുന്നു. എട്ട് വർഷങ്ങൾക്ക് മുൻപായിരുന്നു അജിത് – വിജയ് ചിത്രങ്ങൾ ഒന്നിച്ച് റിലീസിനെത്തിയത്. ജില്ലയും വീരവുമായിരുന്നു.