നീയൊക്കെ എന്തിനാടോ ഹിന്ദുക്കളുടെ ഓണം ആഘോഷിയ്ക്കുന്നത് എന്ന് കമന്റ്; ബിനീഷ് ബാസ്റ്റിന്റെ മറുപടി ഞെട്ടിച്ചു !
മലയാളികളുടെ പ്രിയ നടനാണ് ബിനീഷ് ബാസ്റ്റിൻ. മലയാളം, തമിഴ് ഭാഷകളിലായി നിരവധി സിനിമകളിൽ വില്ലൻ വേഷങ്ങളിൽ എത്തിയ താരമാണ് ബിനീഷ് ബാസ്റ്റിൻ. നിരവധി സിനിമകളില്‍ അഭിനയിച്ചിട്ടുണ്ട് എങ്കിലും ബിനീഷ് ബാസ്റ്റിനെ പ്രേക്ഷകര്‍ സ്‌നേഹിച്ചു തുടങ്ങിയത് സ്റ്റാര്‍ മാജിക്കിന് ശേഷമാണ്. അതിന് ശേഷം യൂട്യൂബ് വീഡിയോസിലൂടെ ബിനീഷിനെ കൂടുതല്‍ അറിഞ്ഞു. എന്ത് തന്നെയായാലും ഇപ്പോള്‍ കേരളക്കരയില്‍ വലിയൊരു ആരാധക പിന്തുണ ബിനീഷിനുണ്ട്. ആരാധകര്‍ക്ക് ആയി ഓണാശംസകള്‍ നേര്‍ന്ന് ഫോട്ടോ പങ്കുവച്ചതിന് താഴെ വര്‍ഗീയ കമന്റ് ഇട്ട ആള്‍ക്ക് ഇടിവെട്ട് മറുപടി നല്‍കിയാണ് ഇപ്പോള്‍ ബിനീഷ് ബാസ്റ്റിന്‍ കൈയ്യടി നേടുന്നത്.
പ്രിയപ്പെട്ടവര്‍ക്ക് ഞങ്ങളുടെ ഓണാശംസകള്‍ എന്ന് പറഞ്ഞ് സുഹൃത്തുക്കള്‍ക്ക് ഒപ്പം നില്‍ക്കുന്ന ഒരു ഫോട്ടോ ആണ് ബിനീഷ് പങ്കുവച്ചത്. അതിന് താഴെയാണ് ഒരു സ്ത്രീ വര്‍ഗീയ കമന്റ് പോസ്റ്റ് ചെയ്തത്. ‘നീയൊക്കെ എന്തിനാടോ ഹിന്ദുക്കളുടെ ഓണം ആഘോഷിയ്ക്കുന്നത്. ഇത് ക്രിസ്ത്യാനികളുടെയും മുസ്ലീമിന്റെയും ഓണാഘോഷമല്ല. ഇന്നലെ മുസ്ലിം പെണ്‍കുട്ടികളുടെ ഓണത്തിന്റെ പരിപാടിയില്‍ ഡാന്‍സും പാട്ടും എല്ലാം കണ്ടപ്പോള്‍ ഇന്ത്യ എന്ന ഹിന്ദു രാഷ്ട്രം ഇസ്ലാമിക രാഷ്ട്രം എന്നായി പോയോ എന്നൊരു തോന്നല്‍’ എന്നാണ് ഒരു ഹിന്ദു വിശ്വാസിയായ സ്ത്രീയുടെ പോസ്റ്റ്.
സ്ത്രീയുടെ കമന്റിന് താഴെ നിരവധി ആളുകള്‍ മറുപടിയുമായി എത്തി. ഓണം എന്താണെന്ന് അറിയില്ല എങ്കില്‍ വീട്ടില്‍ പ്രായമുള്ള ആരെങ്കിലുമുണ്ടെങ്കില്‍ അവരോട് ചോദിയ്ക്കൂ എന്നൊക്കെ പറഞ്ഞുകൊണ്ടാണ് മറുപടി. സ്ത്രീയുടെ കമന്റ് സ്‌ക്രീന്‍പ്രിന്റ് എടുത്ത് തന്റെ പേജില്‍ പങ്കുവച്ചുകൊണ്ടാണ് ബിനീഷ് ബാസ്റ്റിന്‍ മറുപടി നല്‍കിയത്. ‘ഓണം മലയാളികളുടെ ദേശീയ ഉത്സവമാണ്. ഞങ്ങള്‍ ആഘോഷിക്കും, ബിനീഷ് ബാസ്റ്റിനും അനസ് പാണാവള്ളിയും സാലു കുമ്പളങ്ങിയും ചങ്കുകളാണ്. ഇവിടെ വര്‍ഗ്ഗീയത പുലമ്പാന്‍ ആളെ ആവശ്യമില്ല. വര്‍ഗ്ഗീയത തുലയട്ടെ’ എന്നാണ് ബിനീഷിന്റെ മറുപടി.
ബിനീഷ് മറുപടി നല്‍കിയതോടെ സ്ത്രീയുടെ ഫേസ്ബുക്ക് പേജില്‍ തെറിയഭിഷേകമായി. അവസാനം അത് തന്റെ അക്കൗണ്ട് അല്ല എന്ന് പറഞ്ഞ് അവര്‍ ബിനീഷിനെ വിളിച്ചു. ആ ഓഡിയോക്ലിപ്പും ബിനീഷ് തന്റെ ഫേസ്ബുക്ക് പേജിലൂടെ പങ്കുവച്ചു. അത് എന്റെ പേരിലുള്ള വ്യാജ പ്രൊഫൈലാണ്, ഞാനല്ല ആ കമന്റ് എഴുതിയത് എന്നൊക്കെയാണ് സ്ത്രീ തുടക്കത്തില്‍ പറയുന്നത്. എന്നാല്‍ അത് ഫേക്ക് അക്കൗണ്ട് ആണെന്ന് തോന്നുന്നില്ല, അങ്ങനെയാണെങ്കില്‍ തന്നെ നിങ്ങളുടെ പേരില്‍ ഫേക്ക് അക്കൗണ്ട് ഉണ്ടാക്കിയ ആളെ വിളിക്ക് എന്നായി ബിനീഷ്. അവസാനം സ്ത്രീ കേസ് കൊടുക്കും എന്നൊക്കെ ഭീഷണിപ്പെടുത്തുന്നതും ഓഡിയോക്ലിപ്പില്‍ കേള്‍ക്കാം. എന്നാല്‍ നിങ്ങള്‍ കൊടുക്കൂ എന്നാണ് ബിനീഷിന്റെ മറുപടി.
അതേ സമയം ഈ സ്ത്രീയുടെ ഫേസ്ബുക്ക് പേജില്‍ വര്‍ഗ്ഗീയത കമന്റ് ഇട്ടതിന് തെറിയുടെ പൂരപ്പാട്ടാണ്. എല്ലാ പോസ്റ്റിന് താഴെയും ചീത്ത വിളികള്‍ തന്നെ. ഒരു പോസ്റ്റില്‍ ‘ഞാനും ചേട്ടനും ഓണ ദിവസം മദ്യപിച്ച് ഓവറായിരുന്നു, അതിനാല്‍ എഴുതിയത് എന്താണെന്ന് അറിയില്ല, ആരെയെങ്കിലും വേദനിപ്പിച്ചിട്ടുണ്ടെങ്കില്‍ മാപ്പ്’ എന്നും പറഞ്ഞിട്ടുണ്ട്.
