എന്റെ ജീവന് ഭീഷണിയുണ്ടായിരുന്നു എന്റെ പണം അപഹരിക്കപ്പെട്ടു എന്റെ സ്വകാര്യത ആക്രമിക്കപ്പെട്ടു എന്റെ കുടുംബം ശിഥിലമായി; പോസ്റ്റുമായി സാമന്ത

തെന്നിന്ത്യയില്‍ നിരവധി ആരാധകരുള്ള താരമാണ് സാമന്ത സാമന്ത റൂത്ത് പ്രഭു. സോഷ്യല്‍ മീഡിയയിലും വളരെ സജീവമായ താരം ഇടയ്ക്കിടെ തന്റെ ചിത്രങ്ങളും വിശേഷങ്ങളും എല്ലാം തന്നെ പങ്കുവെച്ച് എത്താറുണ്ട്. നടന്‍ നാഗചൈതന്യയുമായുളള വിവാഹ മോചനത്തിന് പിന്നാലെയാണ് സാമന്ത വാര്‍ത്തകളിലെയും ഗോസിപ്പ് കോളങ്ങളിലെയും സ്ഥിരസാന്നിധ്യമാകുന്നത്.

ഇപ്പോള്‍ വിവാഹമോചനത്തിന്റെ വിഷമതകളില്‍ നിന്നും കരകയറാന്‍ യാത്രകളും സിനിമാ ചിത്രീകരണങ്ങളുമെല്ലാമായി തിരക്കിലാണ് താരം. സ്വയം പ്രചോദനമാകുകയും മറ്റുള്ളവര്‍ക്ക് പ്രചോദനമാകുകയും ചെയ്താണ് സാമന്ത സെലിബ്രിറ്റി ജീവിതം കൊണ്ടുപോകുന്നത്. സമൂഹത്തെ ഉദ്‌ബോധിപ്പിക്കുന്ന തരത്തിലടക്കമുള്ള മഹാന്മാരുടെ വാക്കുകളും മറ്റും സോഷ്യല്‍മീഡിയയില്‍ സാമന്ത പങ്കുവെക്കാറുമുണ്ട്. അത്തരത്തില്‍ സാമന്ത പങ്കുവെച്ച ഇന്‍സ്റ്റഗ്രാം സ്റ്റോറിയാണ് താരത്തിന്റെ ആരാധകര്‍ക്കിടയില്‍ ചര്‍ച്ചയാകുന്നത്.

അമേരിക്കന്‍ നടനും നിര്‍മാതാവും റാപ്പറും ഗാന രചയിതാവുമെല്ലാമായ വില്ലാര്‍ഡ് കാരോള്‍ വില്‍ സ്മിത്ത് എന്ന വില്‍ സ്മിത്തിന്റെ പുസ്തകത്തില്‍ നിന്നുള്ള ചില വരികളാണ് സാമന്ത ഇപ്പോള്‍ പങ്കുവെച്ചിരിക്കുന്നത്. വില്‍ സ്മിത്തിന്റെ വരികളിലൂടെ സാമന്ത തന്റെ ജീവിതത്തിലെ അവസ്ഥയെ കുറിച്ച് പറയാതെ പറയുകയാണോ എന്നാണ് ഇപ്പോള്‍ ആരാധകരും ചിന്തിക്കുന്നത്.

വില്‍ സ്മിത്തിന്റെ വില്‍ എന്ന പുസ്തകം വായിച്ച് തീര്‍ന്നപ്പോഴുള്ള അനുഭവവും സാമന്ത പങ്കുവെച്ചിരുന്നു. മനോഹരവും ആകര്‍ഷകവുമാണ് വില്‍ സ്മിത്തിന്റെ വില്‍ എന്ന ബുക്ക് എന്നാണ് സാമന്ത കുറിച്ചത്. പുസ്തകത്തില്‍ നിന്നും സാമന്ത സ്റ്റോറിയാക്കിയ വരികളുടെ അര്‍ത്ഥം ഇങ്ങനെയായിരുന്നു. ‘കഴിഞ്ഞ മുപ്പത് വര്‍ഷമായി നിങ്ങള്‍ എല്ലാവരെയും പോലെ പരാജയം, നഷ്ടം, അപമാനം, വിവാഹമോചനം, മരണം എന്നിവയെ എനിക്കും കൈകാര്യം ചെയ്യേണ്ടി വന്നിട്ടുണ്ട്.

എന്റെ ജീവന് ഭീഷണിയുണ്ടായിരുന്നു എന്റെ പണം അപഹരിക്കപ്പെട്ടു എന്റെ സ്വകാര്യത ആക്രമിക്കപ്പെട്ടു എന്റെ കുടുംബം ശിഥിലമായി. എങ്കിലും എല്ലാ ദിവസവും ഞാന്‍ എഴുന്നേറ്റു. വീണ്ടും ജീവിതം കെട്ടിപടുക്കാനായി ഒരോ കല്ലും പ്രവൃത്തിയിലൂടെ കൂട്ടിവെച്ചു. പലരും പല ചോദ്യങ്ങളുമായി വന്നു. പരിഹാസങ്ങളുണ്ടായി അപ്പോഴും തോറ്റ ഭാഗത്തേക്കല്ല… ജയിക്കാനുള്ള ഭാഗത്തേക്ക് ഞാന്‍ നോക്കി. ഒപ്പം തളര്‍ന്ന് കിടക്കില്ല… എഴുന്നേറ്റ് നടക്കും എന്നും തീരുമാനിച്ചു’വില്‍ സ്മിത്ത് ബുക്കിലെഴുതിയ ഈ വരികളാണ് സാമന്ത പങ്കുവെച്ചത്.

‘കഠിനാധ്വാനം ചെയ്യുക… നിങ്ങളുടെ തിരിച്ചടികളില്‍ നിന്ന് പഠിക്കുക… സ്വയം പ്രതിഫലിപ്പിക്കുക… സ്വയം പുനര്‍നിര്‍മ്മിക്കുക… ഒരിക്കലും ഉപേക്ഷിച്ച് പോകരുത്’ പുസ്തകത്തെ അഭിനന്ദിച്ച് ആരാധകരെ പ്രചോദിപ്പിക്കാന്‍ സാമന്ത സോഷ്യല്‍മീഡിയയില്‍ എഴുതിയത് ഇങ്ങനെയായിരുന്നു. ഇതിന് നിരവധി പേരാണ് കമന്റുകളുമായി എത്തിയിരിക്കുന്നത്! കാര്യങ്ങള്‍ കുറച്ച് സീരീസാണല്ലോ…, എത്ര കോടിയുടെ നഷ്ടം വന്നു.., സാമന്തയുടെ ജീവിതം തന്നെ ആണല്ലേ ഇത്, ജീവന് ഭീഷണി ഉണ്ടായോ…, പൊരുതി ജീവിക്കൂ…, എന്ന് തുടങ്ങി താരത്തിന് ആത്മവിശ്വാസം നല്‍കുന്ന തരത്തിലാണ് പലരും അഭിപ്രായം രേഖപ്പെടുത്തിയിരിക്കുന്നത്.

ഇക്കഴിഞ്ഞ ഒക്ടോബറിലായിരുന്നു നാല് വര്‍ഷത്തെ വിവാഹ ജീവിതം അവസാനിപ്പിച്ച് സാമന്തയും നാഗചൈതന്യയും പിരിഞ്ഞത്. അന്ന് ഏറ്റവും കൂടുതല്‍ വിമര്‍ശനം കേള്‍ക്കേണ്ടി വന്ന വ്യക്തി സാമന്തയായിരുന്നു.സാമന്ത അബോര്‍ഷന്‍ ചെയ്തുവെന്ന തരത്തില്‍ വരെ വാര്‍ത്തകള്‍ പ്രചരിച്ചിരുന്നു. നടപടി ആവശ്യപ്പെട്ട് കോടതിയെ സമീപിക്കുകയും ചെയ്തിരുന്നു സാമന്ത. ഇപ്പോള്‍ നെഗറ്റീവ് കമന്റുകളോട് മുഖം തിരിച്ച് നടന്ന് മുന്നിലുള്ള ജീവിതം ഇഷ്ടമുള്ളതെല്ലാം ചെയ്ത് ആസ്വദിക്കുകയാണ് സാമന്ത.

പുഷ്പയാണ് ഏറ്റവും അവസാനം റിലീസ് ചെയ്ത സാമന്തയുടെ ചിത്രം. കാത്ത് വാക്കിലെ രണ്ട് കാതല്‍ അടക്കം നിരവധി സിനിമകള്‍ സാമന്തയുടേതായി അണിയറയില്‍ ഒരുങ്ങുന്നുമുണ്ട്. കഴിഞ്ഞ ദിവസം സാമന്തയുടെ ശാകുന്തളത്തിന്റെ ഫസ്റ്റ്‌ലുക്ക് പോസ്റ്റര്‍ പുറത്തിറങ്ങിയിരുന്നു. സിനിമയില്‍ ടൈറ്റില്‍ റോളിലാണ് സമാന്ത എത്തുന്നത്. ശകുന്തളയായി കിടിലന്‍ മേക്കോവറിലുള്ള സമാന്തയെ പോസ്റ്ററില്‍ കാണാം.

മലയാളം, കന്നഡ, ഹിന്ദി, തമിഴ്, തെലുങ്ക് ഉള്‍പ്പടെ അഞ്ച് ഭാഷകളിലാണ് ചിത്രം റിലീസിനെത്തുന്നത്. കാളിദാസന്റെ ശാകുന്തളത്തെ ആസ്പദമാക്കി അണിയിച്ചൊരുക്കുന്ന ചിത്രത്തില്‍ വമ്പന്‍ താരനിരയാണ് അണിനിരക്കുന്നത്. സൂഫിയും സുജാതയും എന്ന ചിത്രത്തിലൂടെ ശ്രദ്ധേയനായ ദേവ് മോഹനാണ് ദുഷ്യന്തനായി എത്തുക. രുദ്രമാദേവിക്ക് ശേഷം ഗുണശേഖര സംവിധാനം ചെയ്യുന്ന ചിത്രം നീലിമ ഗുണയും ദില്‍ രാജുവും ചേര്‍ന്നാണ് നിര്‍മിക്കുന്നത്. അല്ലു അര്‍ജുന്റെ മകള്‍ അര്‍ഹയും ചിത്രത്തില്‍ പ്രധാന കഥാപാത്രത്തെ അവതരിപ്പിക്കുന്നുണ്ട്. അര്‍ഹയുടെ ആദ്യ ചിത്രം കൂടിയാണിത്.