Malayalam
ആരോഗ്യ സംരക്ഷണ സംവിധാനത്തിനത്തിന് ഒരു കോടിയിലധികം വില വരുന്ന മെഡിക്കല്‍ ഉപകരണങ്ങള്‍ നല്‍കി മോഹന്‍ലാലിന്റെ നേതൃത്വത്തിലുള്ള വിശ്വശാന്തി ഫൗണ്ടേഷന്‍
ആരോഗ്യ സംരക്ഷണ സംവിധാനത്തിനത്തിന് ഒരു കോടിയിലധികം വില വരുന്ന മെഡിക്കല്‍ ഉപകരണങ്ങള്‍ നല്‍കി മോഹന്‍ലാലിന്റെ നേതൃത്വത്തിലുള്ള വിശ്വശാന്തി ഫൗണ്ടേഷന്‍
കോവിഡ് രണ്ടാം തരംഗത്തില്‍ ആരോഗ്യ സംരക്ഷണ സംവിധാനത്തിന് അടിസ്ഥാന സൗകര്യങ്ങള്‍ ഏര്‍പ്പെടുത്തി മോഹന്‍ലാലിന്റെ നേതൃത്വത്തിലുള്ള വിശ്വശാന്തി ഫൗണ്ടേഷന്‍. കേരളത്തില്‍ സര്‍ക്കാര്‍, സ്വകാര്യ, കോപ്പറേറ്റീവ് മേഖലകളിലുള്ള വിവിധ ആശുപത്രികളിലായി, ഓക്സിജന്‍ ലഭ്യതയുള്ള 200ല്‍ അധികം കിടക്കകള്‍ വിശ്വശാന്തി ഫൗണ്ടേഷന്‍ ലഭ്യമാക്കിയതായി പ്രസ്ഥാനത്തിന്റെ വക്താവ് അറിയിച്ചു.
ഇതിനോടൊപ്പം, വെന്റിലേറ്റര്‍ സംവിധാനത്തോടു കൂടിയ പത്തോളം ഐ സി യു ബെഡ്ഡുകളും പ്രവര്‍ത്തനസജ്ജമാക്കി. കോവിഡ് രോഗികളുടെ ചികിത്സാര്‍ത്ഥം, 1.5 കോടിയോളം വില വരുന്ന മെഡിക്കല്‍ ഉപകരണങ്ങളാണ് ആശുപത്രികള്‍ക്ക് വിശ്വശാന്തി നല്‍കുന്നത്. കോവിഡ് ചികിത്സക്ക് സഹായകമാകുന്ന പോര്‍ട്ടബിള്‍ എക്സ്റേ മെഷീനുകളും ചില ആശുപത്രികള്‍ക്ക് നല്‍കിയിട്ടുണ്ട്.
കളമശ്ശേരി മെഡിക്കല്‍ കോളേജിലെ രണ്ട് വാര്‍ഡുകളിലേക്കും ട്രയേജ് വാര്‍ഡിലേക്കും ഓക്സിജന്‍ പൈപ്പ്‌ലൈന്‍ സ്ഥാപിക്കാനുള്ള സഹായവും ഫൗണ്ടേഷന്‍ നല്‍കി. കോവിഡ് രോഗവ്യാപനം തീവ്രമായ, രാജ്യത്തെ അനേകം നഗരങ്ങളില്‍ ചികിത്സാ സംവിധാനങ്ങള്‍ മെച്ചപ്പെടുത്താനായി, ഇത്തരത്തില്‍ സൗകര്യമൊരുക്കാനുള്ള പദ്ധതി വിശ്വശാന്തി ഫൗണ്ടേഷന്‍ അടിയന്തിരമായി ആസൂത്രണം ചെയ്തു വരുന്നു.
ഇവൈ ജിഡിഎസ് (EY GDS), യു.എസ്.ടെക്നോളജീസ് (UST ) എന്നീ സ്ഥാപനങ്ങളുടെ സഹായത്തോടെയാണ് വിശ്വശാന്തി ഫൗണ്ടേഷന്‍ പദ്ധതി നടപ്പിലാക്കിയത്. കോവിഡിനെതിരെയുള്ള പോരാട്ടത്തിന്റെ ഭാഗമായ ഈ പദ്ധതിയില്‍ വിശ്വശാന്തിയോടൊപ്പം സഹകരിച്ച ഇവൈ ജിഡിഎസ്, യു എസ് ടി എന്നീ സ്ഥാപനങ്ങള്‍ക്കും, പങ്കാളികളായ എല്ലാ ആശുപത്രികള്‍ക്കും നന്ദി അറിയിക്കുന്നതായും വക്താവ് കൂട്ടിച്ചേര്‍ത്തു.
കേരള സര്‍ക്കാരിന്റെ കാസ്പ് പദ്ധതിയില്‍ രോഗികള്‍ക്ക് സൗജന്യ ചികിത്സ നല്‍കുന്ന താഴെ പറയുന്ന ആശുപത്രികളെയാണ്, ഈ പദ്ധതിയില്‍ പങ്കാളികളായി വിശ്വശാന്തി ഫൗണ്ടേഷന്‍ തിരെഞ്ഞെടുത്തിട്ടുള്ളത്.
- ഗവ.മെഡിക്കല്‍ കോളേജ്, കളമശ്ശേരി
- ഇന്ദിരാ ഗാന്ധി കോ-ഓപ്പറേറ്റിവ് ഹോസ്പിറ്റല്‍, എറണാകുളം
- ലക്ഷ്മി ഹോസ്പിറ്റല്‍, എറണാകുളം & ആലുവ
- എസ് പി ഫോര്‍ട്ട് ഹോസ്പിറ്റല്‍, തിരുവനന്തപുരം
- സുധീന്ദ്ര മെഡിക്കല്‍ മിഷന്‍, എറണാകുളം
- ആറ്റുകാല്‍ ദേവി ട്രസ്റ്റ് ഹോസ്പിറ്റല്‍, തിരുവനന്തപുരം
- കൃഷ്ണ ഹോസ്പിറ്റല്‍, എറണാകുളം
- ഭാരത് ഹോസ്പിറ്റല്‍, കോട്ടയം
- സറഫ് ഹോസ്പിറ്റല്‍, എറണാകുളം
- സേവന ഹോസ്പിറ്റല്‍, പാലക്കാട്
- ലോര്‍ഡ്‌സ് ഹോസ്പിറ്റല്‍, തിരുവനന്തപുരം
- ലേക്ഷോര്‍ ഹോസ്പിറ്റല്‍, എറണാകുളം
- ഗവ.താലൂക്ക് ഹോസ്പിറ്റല്‍, പട്ടാമ്പി
