ബലാത്സംഗ രംഗങ്ങളെ എതിര്‍ക്കുന്നവരെയും അവരുടെ കുടുംബത്തെയോ പങ്കാളിയെയോ ചീത്ത വിളിക്കുന്നത് ഞാന്‍ ഒരിക്കലും കണ്ടിട്ടില്ല; പിന്നെന്തിനാണ് ഈ വിഷയത്തില്‍ മാത്രം ഇങ്ങനെ..!; ദുര്‍ഗയ്‌ക്കെതിരെ നടക്കുന്ന സൈബര്‍ ആക്രമണത്തില്‍ പ്രതികരണവുമായി ഡിംപല്‍ ഭാല്‍

വളരെ കുറച്ച് ചിത്രങ്ങളിലൂടെ മലയാളി പ്രേക്ഷകര്‍ക്കേറെ പ്രിയപ്പെട്ട നടിയാണ് ദുര്‍ഖ കൃഷ്ണ. കുടുക്ക് 2025 എന്ന ചിത്രത്തിലെ ഗാനരംഗത്തില്‍ പ്രത്യക്ഷപ്പെട്ട ലിപ് ലോക്കിന്റെ പേരില്‍ ദുര്‍ഗയ്ക്കും ഭര്‍ത്താവിനുമെതിരെ നിരവധി വിമര്‍ശനങ്ങളാണ് ഉയര്‍ന്നു വന്നത്. ഭര്‍ത്താവിന്റെ പൂര്‍ണ പിന്തുണയോടെയാണ് ലിപ് ലോക്ക് ചെയ്തത് എന്നാണ് ദുര്‍ഗ ഒരു അഭിമുഖത്തിലൂടെ പറഞ്ഞിരുന്നു. ഇതിനു പിന്നാലെയാണ് വിമര്‍ശനങ്ങള്‍ ഉയര്‍ന്നു വന്നത്.

ഭര്‍ത്താവിന് നാണമില്ലേ, നട്ടെല്ല് ഇല്ലേ എന്നൊക്കെയുള്ള ചോദ്യങ്ങളായിരുന്നു വന്നത്. ഇത് രൂക്ഷമായതോടെ നടി തന്നെ പ്രതികരണവുമായി രംഗത്തെത്തിയിരുന്നു. ഇന്‍സ്റ്റഗ്രാമില്‍ ലൈവില്‍ എത്തിയാണ് വിഷയത്തെ കുറിച്ച് പ്രതികരിച്ചത്. ഈ വീഡിയോയും വൈറലായി മാറിയതോടെ നിരവധി പേരാണ് ദുര്‍ഗയ്ക്ക് പിന്തുണയുമായി എത്തിയിരുന്നത്.

എന്നാല്‍ ഇപ്പോഴിതാ ഈ വിഷയത്തില്‍ പ്രതികരണവുമായി എത്തിയിരിക്കുകയാണ് ബിഗ്‌ബോസ് സീസണ്‍ മൂന്നിലൂടെ എല്ലാവര്‍ക്കും സുപരിചിതയായ ഡിംപല്‍ ഭാല്‍. ദുര്‍ഗ്ഗയെ കുറിച്ച് അഭിമാനിക്കുന്നു എന്നാണ് ബിഗ് ബോസ് സീസണ്‍ 3 താരം പറഞ്ഞത്. കൂടാതെ അര്‍ജുനും ദുര്‍ഗ്ഗക്കും പിന്തുണയും അറിയിച്ചിട്ടുണ്ട്. ഡിംപലിന്റെ വാക്കുകള്‍ ഇങ്ങനെയായിരുന്നു. ‘ഇന്ന് ഞാന്‍ നിന്നെ കുറിച്ച് അഭിമാനിക്കുന്നു. ചിലരെ എങ്കിലും കലയെ കലയായി തന്നെ കാണാന്‍ ബോധ്യപ്പെടുത്താന്‍ മുന്നിട്ടിറങ്ങിയതിന് നിന്റെ പേരില്‍ ഞാന്‍ അഭിമാനിക്കുന്നു. ഞാന്‍ നിങ്ങളുടെ സെല്‍ഫ് റസ്‌പെക്ടിനെ ബഹുമാനിക്കുന്നു. കലയെ ബഹുമാനിക്കാത്ത ജനക്കൂട്ടത്തിന്റെ ചിന്താ ശേഷിയ്ക്കുമപ്പുറമാണ് നിന്റേയും അര്‍ജുന്റേയും സ്ഥാനം’.

ബലാത്സംഗ രംഗങ്ങളെ എതിര്‍ക്കുന്നവരെയും അവരുടെ കുടുംബത്തെയോ പങ്കാളിയെയോ ചീത്ത വിളിക്കുന്നത് ഞാന്‍ ഒരിക്കലും കണ്ടിട്ടില്ല. അതൊരു മികച്ച പ്രകടനമായിട്ടാണ് എല്ലാവരും കാണുന്നത്. ഈ വിഷയം ലൈവില്‍ വന്ന് സംസാരിക്കാന്‍ വേണ്ടി മാത്രം നിന്നെ എത്രത്തോളം വിഷമിപ്പിച്ചുവെന്ന് എനിക്ക് അറിയാം. മക്കളുടെ സ്വപ്നത്തിന് ഒപ്പം നിന്ന അച്ഛനും അമ്മയുമാണ് നിന്റേത്. നിനക്ക് ദൈവത്തോടും നിന്റെ ഭര്‍ത്താവിനോടും കുടുംബത്തോടും മാത്രം ഉത്തരം പറഞ്ഞാല്‍ മതി.

ഈ വിഷയത്തില്‍ നീ മുന്നോട്ട് വന്ന് പ്രതികരിച്ച് കണ്ടതില്‍ വളരെ അധികം സന്തോഷമുണ്ട്. നിനക്ക് ഇനിയും സഞ്ചരിക്കാനുണ്ട്. നിങ്ങളൊരു നല്ല വ്യക്തിയും മികച്ച അഭിനേതാവുമാണെന്ന് ദുര്‍ഗയെ അഭിനന്ദിച്ച് കൊണ്ട് ഡിപംല്‍ കുറിച്ചു. കൂടാതെ വിമര്‍ശകര്‍ക്കും മറുപടി നല്‍കിയിട്ടുണ്ട്. ‘നിങ്ങള്‍ സംസാരിക്കുന്നതിന് മുമ്പ് ചിന്തിക്കുക, ഒരേ ലിപ് ലോക്കില്‍ സീനില്‍,നടന്റെ ഭാര്യ പിന്തുണയ്ക്കുകയും നടിയുടെ ഭര്‍ത്താവ് തരംതാഴ്ത്തുകയും ചെയ്യുന്നു. ഇതില്‍ അതിശയിക്കാന്‍ ഒന്നുമില്ല. ഇതൊരു സിനിമാ സീന്‍ മാത്രമാണെന്നും ഡിംപല്‍ പറയുന്നു.

ഈ സംഭവവുമായി ബന്ധപ്പെട്ട് ദുര്‍ഗ പറഞ്ഞതിങ്ങനെ ആയിരുന്നു, വളരെ പ്രധാനപ്പെട്ട ഒരു കാര്യം നിങ്ങളുമായി സംസാരിക്കാന്‍ വേണ്ടിയാണ് ഷൂട്ട് കഴിഞ്ഞ് ഒന്ന് ഫ്രഷ് ആവുക പോലും ചെയ്യാതെ ലൈവില്‍ വന്നിരിക്കുന്നത്. കുടക്ക് 2025 എന്ന എന്റെ സിനിമയില്‍ ഒരു പാട്ട് ഇറങ്ങിയിട്ടുണ്ടായിരുന്നു. ആ പാട്ടിന്റെ അവസാനം ലിപ് ലോക്ക് രംഗങ്ങളുണ്ട്. അതാണ് ഇപ്പോള്‍ കേരളത്തില്‍ നടക്കുന്ന പ്രധാന സംഭവം എന്ന നിലയിലാണ് ചിലരുടെ പ്രതികരണങ്ങള്‍. എന്നാല്‍ ആ അഭിമുഖത്തിന് ശേഷം എന്നെ പിന്തുണച്ച എന്റെ ഭര്‍ത്താവ് നാണമില്ലാത്തവനും, എനിക്കൊപ്പം ലിപ് ലോക്ക് ചെയ്ത നടന്റെ ഭാര്യ, വളരെ പിന്തുണയുള്ള പങ്കാളിയും എന്ന തരത്തിലാണ് വ്യാഖ്യാനിക്കപ്പെട്ടത്. അതെന്താണ് അങ്ങനെ എന്ന് എനിക്ക് മനസ്സിലാവുന്നില്ല. ഞങ്ങള്‍ രണ്ട് പേരും ചെയ്ത കാര്യം ഒന്ന് തന്നെയാണ്. എനിക്ക് ഒറ്റയ്ക്ക് ലിപ് ലോക്ക് ചെയ്യാനും പറ്റില്ല. പക്ഷെ വിമര്‍ശനങ്ങള്‍ എനിക്ക് മാത്രം.

ഞാനും എന്റെ ഭര്‍ത്താവ് അര്‍ജ്ജുനും സോഷ്യല്‍ മീഡിയയില്‍ പങ്കുവച്ച ഫോട്ടോയ്ക്ക് വളരെ മോശമായ കമന്റു വന്നു.അത് ഞാന്‍ സ്റ്റോറിയായി പങ്കുവയ്ക്കുകയും ചെയ്തിരുന്നു. നിന്റെ ഭര്‍ത്താവിന് നട്ടെല്ല് ഇല്ലേ എന്നായിരുന്നു കമന്റ്. പിന്നീട് കുറേ ക്ഷമ പറഞ്ഞു. ആ സ്റ്റോറി ഡിലീറ്റ് ചെയ്യണമെന്നൊക്കെ ആ കുട്ടി പറഞ്ഞു. അഭിപ്രായ സ്വാതന്ത്രം എല്ലാവര്‍ക്കും ഉണ്ടല്ലോ എന്നൊക്കെയാണ് പറയുന്നത്. ശരിയാണ് അഭിപ്രായ സ്വാതന്ത്രം എല്ലാവര്‍ക്കും ഉണ്ട്, എന്റെ സിനിമ നന്നായില്ലെങ്കില്‍ നിങ്ങള്‍ക്ക് അത് പറയാം, ആ രംഗം ഇഷ്ടമായില്ലെങ്കില്‍ നിങ്ങള്‍ക്ക് കാണാതിരിക്കാം. പക്ഷെ എന്റെ സ്വകാര്യ ജീവിതത്തില്‍ കയറി ചൊറിയേണ്ട ആവശ്യം ഇല്ല.

ഞാന്‍ എന്താണെന്നും എന്റെ തൊഴിലിനെ കുറിച്ചും എന്റെ ഭര്‍ത്താവിന് നന്നായി അറിയാം.കൂടാതെ ഈ സിനിമയും ആ രംഗവും ഞാന്‍ ചെയ്തത് എന്റെ കല്യാണത്തിന് മുന്‍പ് ആണ്. അതും അദ്ദേഹത്തിന്റെ സപ്പോര്‍ട്ടോടുകൂടെ തന്നെ. കല്യാണം കഴിച്ചു എന്ന് കരുതി ഞാന്‍ എന്റെ തൊഴിലിന് പരിതികള്‍ നിശ്ചയിക്കണം എന്ന നിബന്ധന അദ്ദേഹത്തിന് ഇല്ല. ആ അഭിമുഖത്തിന് ശേഷം എന്റെ ലിപ് ലോക്കിന്റെ പേരില്‍ തെറി വിളി കേള്‍ക്കുന്നത് എന്റെ ഭര്‍ത്താവാണ്. കല്യാണത്തിന് മുന്‍പ് ആയിരുന്നു ഈ രംഗം എങ്കില്‍ ആ തെറി എന്റെ അച്ഛനും അമ്മയും കേള്‍ക്കേണ്ടി വരുമായിരുന്നു. മലയാള സിനിമയിലെ സ്ത്രീകള്‍ ഇത്തരം രംഗങ്ങളില്‍ അഭിനയിക്കാന്‍ പാടില്ല എന്നാണോ. എന്തുകൊണ്ട് നായികമാര്‍ക്ക് നേരെ മാത്രം ഇത്തരം ആക്രമണങ്ങള്‍ വരുന്നു എന്നും ദുര്‍ഗ്ഗ ചോദിക്കുന്നു.

ഈ കമന്റുകള്‍ എന്നെയോ എന്റെ ഭര്‍ത്താവിനെയോ ബാധിയ്ക്കുന്നില്ല. കമന്റ് എഴുതിയ ആളും പിന്നീട് വന്ന് സോറി പറയുകയും വീട്ടുകാര്‍ കാണുമെന്നൊക്കെ പറയുകയും ചെയ്തിരുന്നു. ആ സ്റ്റോറി ഡിലീറ്റ് ചെയ്തു കളയാന്‍ അര്‍ജ്ജുനും എന്നോട് പറഞ്ഞിരുന്നു. പക്ഷെ ഞങ്ങള്‍ക്കുമില്ലേ കുടുംബം. അര്‍ജ്ജുന്റെ സഹോദരങ്ങളും ഇത്തരം കമന്റുകള്‍ കാണുന്നില്ലേ. ഒരു കാര്യവും ഇല്ലാതെ തന്റെ മകനേയും സഹോദരനേയും ഇത്തരത്തില്‍ നാണമില്ലാത്തവന്‍ നട്ടെല്ല് ഇല്ലാത്തവന്‍ എന്നൊക്കെ വിളിച്ചാല്‍ അവര്‍ക്കും വിഷമം തോന്നില്ലേ. ചുരുക്കത്തില്‍ എന്നെയോ എന്റെ ഭര്‍ത്താവിനെയോ കുടുംബത്തിനെയോ മോശമായി ചിത്രീകരിച്ചു കൊണ്ട് കമന്റുകള്‍ ഇടേണ്ടതില്ല. നിങ്ങളുടെ കമന്റുകള്‍ കൊണ്ട് ഞങ്ങളുടെ കുടുംബ ജീവിതത്തിന് യാതൊരു പ്രശ്നവും ഇല്ല. പക്ഷെ നാണമില്ലേ, നട്ടെല്ല് ഇല്ലേ എന്നൊക്കെയുള്ള ചോദ്യം അത്ര സുഖിയ്ക്കുന്നില്ല. സന്തോഷത്തോടെ പോകുന്ന എന്റെ കുടുംബ ജീവിതത്തില്‍ കയറി ആരും ചൊറിയേണ്ട. നിങ്ങള്‍ക്ക് ഇഷ്ടമില്ലെങ്കില്‍ എന്നെ ഫോളോ ചെയ്യേണ്ടതില്ല.. എന്റെ സിനിമകളും കാണേണ്ട- ദുര്‍ഗ്ഗ ലൈവില്‍ പറയുന്നു.