ആ ചിരിയ്ക്ക് പിന്നില്‍ ദില്‍ഷയ്ക്ക് മറ്റൊരു മുഖം ഉണ്ട് ;ധന്യയ്ക്ക് മനുഷ്യത്വമില്ല.. ലക്ഷ്മിപ്രിയ വേദനിപ്പിച്ചു; തന്നെ വേദനിപ്പിച്ചവരെ കുറിച്ച് ശാലിനി!

ബിഗ് ബോസ് മലയാളം സീസണ്‍ 4 അഞ്ചാമത്തെ ആഴ്ചയിലേക്ക് കടന്നിരിക്കുകയാണ്. സംഭവബഹുലമായൊരു ആഴ്ചയായിരുന്നു ബിഗ് ബോസ് വീട്ടില്‍ കടന്നു പോയത്. ബിഗ്ഗ് ബോസ് സീസണ്‍ ഫോറില്‍ നിന്നും രണ്ടാമതായി പുറത്ത് വന്ന മത്സരാര്‍ത്ഥിയാണ് ശാലിനി നായര്‍. പുറത്ത് വന്നിട്ട് ഒരാഴ്ച ആയി, ശാലിനി ഇതുവരെയുള്ള എപ്പിസോഡുകളും കണ്ടു. ഇപ്പോള്‍ അകത്ത് നടന്നതിനെ കുറിച്ചും, പുറത്ത് സംഭവിച്ച കാര്യങ്ങളെ കുറിച്ചും ശാലിനിയ്ക്ക് നല്ല ധാരണയുണ്ട്. ആ വെളിച്ചത്തില്‍ ശാലിനി ബിഗ്ഗ് ബോസ് ഹൗസിലെ മറ്റ് മത്സരാര്‍ത്ഥികളെ കുറിച്ചുള്ള തന്റെ അഭിപ്രായം ഒരു ഓൺലൈൻ മീഡിയക്ക് നല്‍കിയ അഭിമുഖത്തില്‍ സംസാരിക്കുകയുണ്ടായി.

വ്യക്തമായ പ്ലാനിങോടെ വന്ന മത്സരാര്‍ത്ഥിയാണ് റോബിന്‍. ഗെയിമിന്റെ കാര്യത്തില്‍ എത്തുമ്പോള്‍ ഡോക്ടര്‍, ഡോക്ടര്‍ അല്ലാതെയാവും. ഗെയിമിനെ ഗെയിമായി മാത്രമാണ് കാണുന്നത്. മറ്റൊരു കാര്യം ബിഗ്ഗ് ബോസ് ഹൗസില്‍ ഓരോരുത്തരെയും ഒറ്റയ്ക്ക് ഒറ്റയ്ക്ക് കണ്ട് തന്റെ കാര്യം കണ്‍വിന്‍സ് ചെയ്യാന്‍ ഡോക്ടര്‍ ശ്രമിക്കാറുണ്ട്. പക്ഷെ അത് തെറ്റിദ്ധരിക്കപ്പെട്ടിട്ടുണ്ട്. എന്റെ അഭിപ്രായത്തില്‍ വളരെ സിംപിള്‍ ആയിട്ടുള്ള മനുഷ്യനാണ് റോബിന്‍.

തുടക്കത്തില്‍ എല്ലാം എല്ലാവരോട് ചിരിച്ച് സന്തോഷത്തോടെ പെരുമാറുന്ന ദില്‍ഷയെയാണ് കണ്ടത്. ആരെയും വേദനിപ്പിക്കാത്ത, വീട്ടുകാരോട് അത്രയും അടുപ്പമുള്ള കുട്ടി. അങ്ങനെയുള്ള ഒരു ഇമേജില്‍ പോയിക്കൊണ്ടിരിയ്ക്കുകയായിരുന്നു, പക്ഷെ ഈ ചിരിയ്ക്ക് പിന്നില്‍ ദില്‍ഷയ്ക്ക് മറ്റൊരു മുഖം ഉണ്ട് എന്ന് എനിക്ക് അറിയാമായിരുന്നു.

ഞാന്‍ എവിക്ട് ആകുന്ന ദിവസം എനിക്കത് ബോധ്യമായി. ദില്‍ഷയ്ക്ക് നന്നായി സംസാരിക്കാനറിയാം, പെരുമാറാനാറിയാം എന്നാല്‍ ചില കാര്യങ്ങളില്‍ ദില്‍ഷ മറ്റുള്ളവര്‍ക്ക് വേണ്ടി ചെയ്യുകയാണ്. ക്യാപ്റ്റന്‍സി സമയത്ത് ഒരു പക്ഷം മാത്രം നിന്ന് സംസാരിക്കുന്നതാണ് കണ്ടത്. ദില്‍ഷ കാരണമാണ് ഞാന്‍ ഒരു പ്രശ്‌നത്തില്‍ വന്നതും, പുറത്തായതും, അതിന്റെ വിഷമം എനിക്കുണ്ട്.ഡെയ്‌സി നല്ല മത്സരാര്‍ത്ഥിയാണ്. ഷോയെ കുറിച്ച് പഠിച്ചിട്ടാണ് വന്നത്. പക്ഷെ ഡെയ്‌സി ഷോയില്‍ തന്റെ സ്‌പേസ് ഉണ്ടാക്കുന്നത് മറ്റുള്ളവരുടെ തെറ്റുകള്‍ കണ്ട് പിടിച്ച്, അതിനെ കുറിച്ച് അവരോട് തന്നെ പറഞ്ഞിട്ടാണ്. അതേ സമയം തന്റെ തെറ്റുകള്‍ പറയുന്നത് ഇഷ്ടമല്ലാത്ത ആളുമാണ്.

ഒരു നടി എന്ന നിലയില്‍ ധന്യ മേരി വര്‍ഗ്ഗീസിനെ എനിക്ക് ഇഷ്ടമാണ്. ജീവിതത്തിലും ഒരുപാട് കഷ്ടപ്പാടുകള്‍ നേരിട്ടിട്ടുള്ള ആളാണ്. എന്നാല്‍ അതൊന്നും ധന്യ തിരിച്ച് സഹജീവികളോട് കാണിക്കുന്നില്ല. ഭക്ഷണത്തിന്റെ കാര്യത്തില്‍ ആയാലും മറ്റെന്തില്‍ ആയാലും മറ്റൊരാള്‍ക്ക് കൊടുക്കുമ്പോള്‍ ആത്മാര്‍ത്ഥതയില്ല. മനുഷ്യത്വം ഉള്ള ആളാണെന്ന് എനിക്ക് തോന്നിയിട്ടില്ല. എപ്പിസോഡ് കണ്ടപ്പോഴാണ് അത് മനസ്സിലായത്.

റേഷന്‍ ഒന്നും ഇല്ലാത്ത സമയത്ത് പോലും വെറും പച്ചക്കറി സാധനങ്ങള്‍ വച്ച് ഞങ്ങളുടെ വയറ് നിറച്ച ആളാണ് ലക്ഷ്മിപ്രിയ. അവിടെ വച്ച് എനിക്ക് പോസിറ്റീവ് ആയിട്ടാണ് തോന്നിയത്. പക്ഷെ ഇപ്പോള്‍ പുറത്തിറങ്ങിയ ശേഷം ചിലത് കണ്ടപ്പോള്‍ വല്ലാത്ത വിഷമം തോന്നി. ‘നീ അവളെ വളര്‍ത്തരുത്, കൊഞ്ചിക്കരുത് റിജക്ട് ചെയ്‌തേക്കണം’ എന്നൊക്കെ പറഞ്ഞ് എന്നെ ഒറ്റപ്പെടുത്താന്‍ ശ്രമിച്ച സംഭവം ലക്ഷ്മി ചേച്ചിയുടെ ഭാഗത്ത് നിന്ന് ഞാന്‍ ഒരിക്കലും പ്രതീക്ഷിച്ചിരുന്നില്ല.

വളരെ സിംപിള്‍ ആയിട്ട് പോകുന്ന മത്സരാര്‍ത്ഥിയാണ് ജാസ്മിന്‍. അവള്‍ എല്ലാവരോടും ഒരുപോലെ തന്നെയാണ് പ്രതികരിയ്ക്കുന്നത്. നേരത്ത് ഭക്ഷണം കഴിക്കണം, വലിക്കണം എന്ന് തോന്നുമ്പോള്‍ പുക വലിക്കണം അങ്ങനെയൊക്കെയാണ്. പിന്നെ ആവശ്യമുള്ള ഇടത്തും ഇല്ലാത്തിടത്തും പ്രതികരിക്കുന്നത് അവളുടെ ക്യാരക്ടര്‍ അങ്ങനെ ആയത് കൊണ്ടാണ്. ജാസ്മിനുമായി എനിക്ക് നല്ല സൗഹൃദം മാത്രമേയുള്ളൂ.

about shalini nair