ഞങ്ങളുടെ പൂജ മുറിയിൽ ​ഗണപതിയും യേശുവും ഉണ്ട്; പഴയ ചിന്താ​ഗതിയൊക്കെ മാറ്റിവെച്ചു സ്നേഹത്തിനും മുൻതൂക്കം കൊടുക്കണം! തുറന്ന് പറഞ്ഞ് ടോഷും ചന്ദ്ര ലക്ഷ്മണും!

മിനി സ്ക്രീൻ പ്രേക്ഷകർക്കും ബി​ഗ് സ്ക്രീൻ പ്രേക്ഷകർക്കും ഒരുപോലെ സുപരിചിതരായ രണ്ടുപേരാണ് ചന്ദ്ര ലക്ഷ്മണും ടോഷ് ക്രിസ്റ്റിയും. സ്വന്തം സുജാത’ എന്ന സീരിയലിലൂടെ കണ്ടു മുട്ടി, പ്രണയത്തിലാവുകയും, പിന്നീട്
വിവാഹിതരുവുകയായിരുന്നു. ഒരു സീരിയൽ കഥ പോലെ തന്നെയാണ് ദമ്പതികളായ ടോഷിന്റെയും ചന്ദ്ര ലക്ഷ്മണിന്റെയും പ്രണയ കഥയും. രണ്ടു മതത്തിൽപെട്ട താരങ്ങളുടെ വ്യത്യസ്തമായ വിവാഹവും വാർത്തകളിൽ നിറഞ്ഞിരുന്നു. ഇപ്പോഴിതാ വിവാഹത്തിന് ശേഷം പുതിയ വിശേഷങ്ങൾ പങ്കുവെച്ചിരിക്കുകയാണ് താരങ്ങൾ. ഒരു മാധ്യമത്തിന് നൽകിയ അഭിമുഖത്തിലാണ് ദമ്പതികൾ മനസ് തുറന്നത്.

വിവാഹം കഴിഞ്ഞു എങ്കിലും ജീവിതത്തിൽ വലിയ മാറ്റങ്ങൾ ഒന്നും ഉണ്ടായതായതായി തോന്നുന്നില്ല എന്നാണ് ചന്ദ്ര ലക്ഷ്മൺ പറയുന്നത്. തന്റെ ജീവിതത്തിൽ ഒഴിഞ്ഞു കിടന്ന ഒരുപാട് സ്ഥാനങ്ങളിലേക്ക് ഒരാൾ എത്തിയ പോലെയാണ് തോന്നുന്നത് എന്ന് താരം പറയുന്നു. “പ്രത്യേകിച്ച് ഒന്നും മാറിയതായി എനിക്ക് തോന്നുന്നില്ല. ചിലപ്പോൾ ഞാൻ തന്നെ ആലോചിക്കാറുണ്ട്, ‘ശരിയാണല്ലോ കല്യാണം കഴിഞ്ഞു മാസങ്ങൾ ആയല്ലേ!’ ജീവിതം കൂടുതൽ ഇൻട്രെസ്റ്റിംഗ് ആയ പോലെ തോന്നുന്നു. ഒറ്റ കുട്ടി ആയത് കൊണ്ട് അങ്ങനെ ആരുമായി ഒന്നും പങ്കുവെക്കേണ്ട കാര്യം ഒന്നും ജീവിതത്തിൽ ഇതുവരെ ഉണ്ടായിട്ടില്ല. എന്നാൽ ഇപ്പോൾ എല്ലാം പങ്കുവെക്കാൻ ഒരാൾ ഉള്ളതുപോലെ. അതൊരു പുതിയ അനുഭവം തന്നെ. അതുപോലെ, എന്റെ ജീവിതത്തിൽ ഒഴിഞ്ഞു കിടന്ന കുറെ സ്ഥാനങ്ങളിലേക്ക് ഒരാൾ വന്നത് പോലെ. ഒരു നല്ല സുഹൃത്ത്, കെയർ ചെയ്യുന്ന പങ്കാളി, കരിയർ അഡ്വൈസർ, അങ്ങനെ എല്ലാം,” ചന്ദ്ര ലക്ഷ്മൺ പറഞ്ഞു.

ചന്ദ്രയെപ്പോലെ തന്നെ വിവാഹം ശേഷം ജീവിതത്തിൽ വലിയ മാറ്റങ്ങളൊന്നും ഉണ്ടായതായി ടോഷിനും തോന്നുന്നില്ല. തന്റെ മമ്മിക്കും പപ്പക്കും ഒപ്പം ഇപ്പോൾ അപ്പയും അമ്മയും വന്നു എന്നല്ലാതെ. “ഞാൻ കുറച്ചു മടിയൊക്കെ ഉള്ള മനുഷ്യനാണ്. എന്തിനും ഏതിനും എനിക്ക് ഒരാളുടെ ഒരു തള്ളു വേണം. ഇപ്പോൾ ചന്തുവാണ് ആ റോൾ കൈകാര്യം ചെയ്യുന്നത്. എന്റെ പരിമിതികളെ നീക്കുവാൻ ഉത്തരവാദിത്തമുള്ള ഒരാൾ കൂടെ ഉള്ള പോലെ. പിന്നെ എന്റെ കുടുംബം ഇപ്പോൾ വലുതായല്ലോ. എന്റെ പപ്പക്കും മമ്മക്കും ഒപ്പം ഇപ്പോൾ അപ്പയും അമ്മയും,” ടോഷ് പറഞ്ഞു.

കല്യാണ ശേഷം ഇപ്പോൾ ഏറ്റവും ത്രില്ല് ഒന്നിച്ചു ജോലിക്കു പോകുവാൻ കഴിയുന്നതാണ് എന്നാണ് ചന്ദ്ര പറയുന്നത്. അതൊരു ദമ്പതികളുടെ ഭാഗ്യം തന്നെയാണ് എന്നാണ് നടി പറയുന്നത്. “അതൊരു അനുഗ്രഹം തന്നെയാണ്. കല്യാണം കഴിഞ്ഞത് മുതൽ ഞങ്ങൾ ഒന്നിച്ചാണ് ഷൂട്ടിന് പോകുന്നത്. സെറ്റിൽ ആണെങ്കിലും അദ്ദേഹം നന്നായി ചെയ്യുന്നു എന്ന് എനിക്ക് ഉറപ്പ് വരുത്താം. എന്റെ അഭിനയത്തിൽ നിർദേശങ്ങൾ അദ്ദേഹവും തരും,” ചന്ദ്ര കൂട്ടിചേർത്തു.

മിശ്ര വിവാഹം ആയിരുന്നു എങ്കിലും തങ്ങൾക്ക് അത്രക്കൊന്നും കഷ്ടതകൾ അനുഭവിക്കേണ്ടി വന്നില്ല എന്നാണ് ഇവർ പറയുന്നത്. രണ്ടു കുടുംബങ്ങൾക്കും സമ്മതം ആയത് കൊണ്ട് തന്നെ ബുദ്ധിമുട്ടുകൾ ഒന്നും വരാതെ തന്നെ കല്യാണത്തിലേക്കു കാര്യങ്ങൾ എത്തി എന്നും ഇവർ പറയുന്നു. “ഞങ്ങളുടെ വിവാഹത്തിന് വലിയ പ്രശ്നങ്ങൾ ഒന്നും ഉണ്ടായില്ല. ശരിയാണ് രണ്ടു പേരും രണ്ടു മതത്തിൽ നിന്നും രണ്ടു സംസ്കാരത്തിൽ നിന്നും ഉള്ളവരാണ്. എങ്കിലും രണ്ടു പേരുടെയും കുടുംബങ്ങൾ ഞങ്ങളുടെ ഈ വ്യത്യസ്തതകൾക്കു മുകളിലാണ് ഞങ്ങളുടെ സ്നേഹം എന്ന് മനസിലാക്കി. ആ വ്യത്യസ്തതകളെ മാനിച്ചാൽ പിന്നെ പ്രശ്നങ്ങൾ ഒന്നും ഉണ്ടാകില്ല എന്നാണ് ഞങ്ങൾക്ക് തോന്നുന്നത്.

ഞങ്ങളുടെ കല്യാണം പോലെ തന്നെ ഞങ്ങളുടെ പൂജ മുറിയും വ്യത്യസ്തമാണ്. ഞങ്ങൾ എങ്ങനെ ജീവിതം മുന്നോട്ട് കൊണ്ട് പോകുവാനാണ് ശ്രമിക്കുന്നത് എന്ന് അതിൽ നിന്ന് തന്നെ മനസിലാക്കാം. ഞങ്ങളുടെ പൂജ മുറിയിൽ ഒരേ പോലെ യേശുവും ഗണപതിയും ഉണ്ട്, രണ്ടു പേരുടെ വിശ്വാസങ്ങളെയും ഞങ്ങൾ മാനിക്കുന്നു. പഴയ ചിന്താഗതിയൊക്കെ മാറ്റിവെച്ചു സ്നേഹത്തിനു മുൻ‌തൂക്കം കൊടുക്കേണ്ട കാലമായി എന്നാണ് ഞങ്ങൾക്ക് തോന്നുന്നത്,” അവർ പറഞ്ഞു നിർത്തി.

about chandralakshman