‘എന്നും നിന്റെ കൂടെ’… താരങ്ങൾക്ക് പിന്നാലെ നടിക്ക് പിന്തുണയുമായി യുവ​ഗായികമാർ

നടിയെ അക്രമിച്ച കേസില്‍ വെളിപ്പെടുത്തലിന് പിന്നാലെ അതിജീവിതക്ക് പിന്തുണയറിയിച്ച് നിരവധി പേരാണ് രം​ഗത്തെത്തുന്നത്. ​ഇപ്പോഴിതാ നടിയെ പിന്തുണച്ച് എത്തിയിരിക്കുകയാണ് മലയാളത്തിലെ യുവഗായികമാർ.

സിത്താര കൃഷ്ണകുമാർ, റിമി ടോമി, നടിയുടെ അടുത്ത സുഹൃത്തുകൂടിയായ സയനോര എന്നിവരാണ് പിന്തുണയറിയിച്ച് രംഗത്തെത്തിയത്. നടിയുടെ കുറിപ്പ് പങ്കിട്ടുകൊണ്ടാണ് ഗായികമാര്‍ പിന്തുണ പ്രഖ്യാപിച്ചത്. ‘എന്നും നിന്റെ കൂടെ’ എന്നു കുറിച്ചുകൊണ്ടാണ് സയനോര കുറിപ്പ് പങ്കുവച്ചത്. ‘നിസ്സംശയം അവൾക്കൊപ്പം’ എന്നാണ് സിതാരയുടെ കുറിപ്പ്. റിമി ടോമിയും നടിയുടെ പോസ്റ്റ് പങ്കുവച്ചു.

നടി പങ്കുവച്ച കുറിപ്പ് ഇങ്ങനെയായിരുന്നു

ഈ യാത്ര ഒരിക്കലും എളുപ്പമായിരുന്നില്ല. ഇരയാക്കപ്പെടലില്‍ നിന്നും അതിജീവനത്തിലേക്കുള്ള ഈ യാത്ര. അഞ്ചു വര്‍ഷമായി എന്റെ പേരും വ്യക്തിത്വവും, എനിക്ക് സംഭവിച്ച അതിക്രമത്തിനടിയില്‍ അടിച്ചമര്‍ത്തപ്പെട്ടിരിക്കുകയാണ്.

കുറ്റം ചെയ്തത് ഞാന്‍ അല്ലെങ്കിലും എന്നെ അവഹേളിക്കാനും നിശ്ശബ്ദയാക്കാനും ഒറ്റപ്പെടുത്താനും ഒരുപാട് ശ്രമങ്ങള്‍ ഉണ്ടായിട്ടുണ്ട്. എന്നാല്‍, അപ്പോളൊക്കെയും ചിലരൊക്കെ നിശ്ശബ്ദത ഭേദിച്ച് മുന്നോട്ട് വന്നു. എനിക്ക് വേണ്ടി സംസാരിക്കാന്‍, എന്റെ ശബ്ദം നിലയ്ക്കാതിരിക്കാന്‍.

ഇന്ന് എനിക്ക് വേണ്ടി നിലകൊള്ളുന്ന ഇത്രയും ശബ്ദങ്ങള്‍ കേള്‍ക്കുമ്പോള്‍ ഞാന്‍ തനിച്ചല്ലെന്ന് തിരിച്ചറിയുന്നു. നീതി പുലരാനും, തെറ്റു ചെയ്തവര്‍ ശിക്ഷിക്കപ്പെടാനും, ഇങ്ങനെയൊരനുഭവം മറ്റാര്‍ക്കും ഉണ്ടാവാതെയിരിക്കാനും ഞാന്‍ ഈ യാത്ര തുടര്‍ന്നു കൊണ്ടേയിരിക്കും. കൂടെ നില്‍ക്കുന്ന എല്ലാവരുടെയും സ്‌നേഹത്തിനു ഹൃദയം നിറഞ്ഞ നന്ദി.

നടിയുടെ ഇൻസ്റ്റഗ്രാം പോസ്റ്റ് വന്നതോടെ മലയാളത്തിലെ നിരവധി താരങ്ങളാണ് നടിക്ക് ഐകദാർഢ്യം പ്രഖ്യാപിച്ചത്. ടൊവിനോ തോമസ്, പൃഥ്വിരാജ് സുകുമാരൻ, പാർവതി തിരുവോത്ത്, ദുൽഖർ സൽമാൻ എന്നിവർ ആദ്യം ഐകദാർഢ്യം പ്രഖ്യാപിച്ചു. പിന്നീട് കുഞ്ചാക്കോ ബോബൻ, നീരജ് മാധവ്, ആഷിഖ് അബു, അന്ന ബെൻ, ഐശ്വര്യ ലക്ഷ്‍മി, നിമിഷ സജയൻ, ആര്യ, റിമ കല്ലിങ്കൽ, അഞ്ജലി മേനോൻ തുടങ്ങി നിരവധി സിനിമാപ്രവർത്തകർ പിന്തുണ അറിയിച്ചു.