തിയേറ്ററില്‍ പോയി സിനിമ കാണുന്നത് സംസ്‌ക്കാരത്തിന്റെ ഭാഗമാണ്, ഒരു സിനിമ കാണാതെ ആഘോഷങ്ങളൊന്നും പൂര്‍ണമാവില്ല; മനസ്സ് തുറന്ന് ആസിഫ് അലി

ഒടിടി റിലീസിനെക്കുറിച്ച് തന്റെ അഭിപ്രായം പങ്കുവെച്ച് നടന്‍ ആസിഫ് അലി. സിനിമ തിയേറ്ററില്‍ പോയി കാണാന്‍ ആഗ്രഹിക്കുന്ന ഒരു സാധാരണ പ്രേക്ഷകനാണ് താന്‍ എന്നായിരുന്നു ആസിഫിന്റെ മറുപടി.

തിയേറ്ററില്‍ പോയി കയ്യടിച്ച് ആസ്വദിച്ച് മാസ് ക്രൗഡിനൊപ്പം കാണണമെന്ന് കരുതുന്ന ആളാണ് ഞാന്‍. ആലോചിച്ചു നോക്കൂ, ഒരു സിനിമ ചെയ്യുമ്പോള്‍ ലൈറ്റിങ് മുതല്‍ സൗണ്ട് വരെയുള്ള കാര്യങ്ങളില്‍ നമ്മള്‍ അത്രയധികം പ്ലാന്‍ ചെയ്യുന്നുണ്ട്.

അതിനായി എത്രയോ ടെക്നീഷ്യന്‍മാര്‍ വര്‍ക്ക് ചെയ്യുന്നുണ്ട്. അതെല്ലാം കഴിഞ്ഞെത്തുന്ന ഒരു സിനിമ, അത് ഒ.ടി.ടിയിലാണ് എത്തുന്നതെങ്കില്‍ പകുതിയിലധികം ആളുകളും മൊബൈല്‍ ഫോണിലാണ് കാണുന്നത്. അപ്പോള്‍ അത് അത്രയും ലിമിറ്റഡായി പോകും. അങ്ങനെ കാണേണ്ട ഒന്നല്ല സിനിമ എന്നാണ് ഞാന്‍ കരുതുന്നത്.

തിയേറ്ററില്‍ പോയി സിനിമ കാണുക എന്നത് ഒരു തരത്തില്‍ നമ്മുടെ സംസ്‌ക്കാരത്തിന്റെ കൂടി ഭാഗമാണ്. പെരുന്നാളായാലും ക്രിസ്മസായാലും ഓണമായാലും തിയേറ്ററില്‍ ഏത് പടമാണ് റിലീസ് ആകുന്നതെന്ന് നോക്കുന്നവരാണ് നമ്മള്‍. തിയേറ്ററില്‍ പോയി ഒരു സിനിമ കാണാതെ ഈ ആഘോഷങ്ങളൊന്നും പൂര്‍ണമാവില്ലെന്ന് കരുതുന്നവരാണ്. സിനിമ തിയേറ്ററില്‍ പോയി കണ്ട് ആസ്വദിക്കുക എന്നത് നമ്മുടെ കള്‍ച്ചറിന്റെ കൂടി ഭാഗമാണ്. ആസിഫ് അലി കൂട്ടിച്ചേര്‍ത്തു. .