വീട്ടിൽ കാണിക്കാൻ ഒരു ഫോട്ടോ എടുക്കണം എന്ന് പറഞ്ഞപ്പോ,പൃഥ്വിരാജ് എടുത്ത് തന്ന ഫോട്ടോയാണിത്; അവാർഡ് ഏറ്റുവാങ്ങി ജോണി ആന്റണി; സന്തോഷം പങ്കുവെച്ച സംവിധായകൻ

നിരവധി ഹിറ്റ് സിനിമകളാണ് സംവിധായകൻ ജോണി ആന്റണി മലയാളികൾക്ക് സമ്മാനിച്ചത്. പത്ത് സിനിമകളാണ് ജോണി ആന്റണി കരിയറില്‍ സംവിധാനം ചെയ്തത്. ഇതില്‍ മിക്ക സിനിമകളും തിയ്യേറ്ററുകളില്‍ ഹിറ്റായിരുന്നു. 2016ല്‍ പുറത്തിറങ്ങിയ തോപ്പില്‍ ജോപ്പനാണ് ജോണി ആന്റണി അവസാനം ചെയ്ത സിനിമ.

സംവിധാനത്തോടൊപ്പം തന്നെ അഭിനയത്തിലും തിളങ്ങുകയാണ് ഇപ്പോൾ ജോണി ആന്റണി. വരനെ ആവശ്യമുണ്ട് എന്ന ചിത്രത്തിലെ പ്രകടനത്തിലൂടെ സൈമ അവാര്‍ഡും സ്വന്തമാക്കിയിരിക്കുകയാണ് അദ്ദേഹം. തനിക്കേറെ പ്രിയപ്പെട്ടവരും പുരസ്‌കാരം സ്വന്തമാക്കിയിട്ടുണ്ടെന്നുള്ളത് ഏറെ സന്തോഷകരമായ കാര്യമാണ്. ദൂരെ നിന്നാണെങ്കിലും കാണണമെന്നാഗ്രഹിച്ചവരെയെല്ലാം നേരില്‍ കാണാനായതിന്റെ സന്തോഷവും അദ്ദേഹം പങ്കുവെച്ചിട്ടുണ്ട്.

അദ്ദേഹത്തിന്റെ കുറിപ്പിന്റെ പൂര്‍ണ്ണരൂപം ഇങ്ങനെയാണ്.

2020 ലെ ബെസ്റ്റ് കോമഡി ആക്റ്ററിനുള്ള അവാർഡ് അനൂപ് സത്യന്റെ ‘വരനെ ആവശ്യമുണ്ട്’ എന്ന സിനിമയിലൂടെ എനിക്ക് ലഭിച്ചു. മുൻനിരയിൽ അല്ലു അർജുൻ,മലയാളത്തിന്റെ പ്രിയ താരങ്ങളായ ജയറാമേട്ടൻ,മികച്ച നടനുള്ള അവാർഡ് വാങ്ങാൻ എത്തിയ പൃഥ്വിരാജ് , ജോജു ജോർജ്, മികച്ച നടിക്കുള്ള അവാർഡ് വാങ്ങാൻ എത്തിയ ശോഭന, സംവിധായകരും സുഹൃത്തുക്കളുമായ സമുദ്രക്കനി, ലിജോ ജോസ് പെല്ലിശ്ശേരി, മഹേഷ് നാരായണൻ അങ്ങനെ എല്ലാവരും ഉണ്ടായിരുന്നു.

പൂർണിമ ജയറാമും, തെലുങ്ക് നടൻ സായികുമാറും ആണെനിക്ക് അവാർഡ് തന്നത്. വീട്ടിൽ കാണിക്കാൻ ഒരു ഫോട്ടോ എടുക്കണം എന്ന് പറഞ്ഞപ്പോ,പൃഥ്വിരാജ് എടുത്ത് തന്ന ഫോട്ടോയാണിത്. പൃഥ്വിരാജിന് ഒരുപാട് നന്ദി. വേറൊരു സന്തോഷം മികച്ച നവാഗത സംവിധായകനുള്ള അവാർഡ് വരനെ ആവശ്യമുണ്ട് എന്ന ചിത്രത്തിലൂടെ അനൂപ് സത്യൻ സ്വന്തമാക്കി എന്നുള്ളതാണ്. അതുപോലെ ശോഭന മാം ആയിരുന്നു മികച്ച നടി. പിന്നെ ഡ്രാമയിലൂടെ എനിക്ക് നല്ലൊരു ബ്രേക്ക് തന്ന രഞ്ജിയേട്ടന് മികച്ച ചിത്രമായ അയ്യപ്പനും കോശിക്കുമുള്ള നിർമാതാവിനുള്ള പുരസ്‌കാരം ഉണ്ടായിരുന്നു. അതും ഇരട്ടി മധുരമായി. ദൂരെ നിന്ന് ആണെങ്കിലും ചിരഞ്ജീവി സാറിനെയും, എപ്പിക്ക് ചിത്രങ്ങളുടെ സംവിധായകനായ കെ വിശ്വനാഥ് സാറിനെയും കാണാൻ സാധിച്ചു. അതിലും ഒരുപാട് സന്തോഷം. സൈമക്കും, എല്ലാവർക്കും നന്ദിയെന്നുമായിരുന്നു ജോണി ആന്റണിയുടെ കുറിപ്പ്.

താരങ്ങളും ആരാധകരുമുള്‍പ്പടെ നിരവധി പേരാണ് ജോണി ആന്റണിക്ക് ആശംസ അറിയിച്ചെത്തിയിട്ടുള്ളത്. അര്‍ഹതയ്ക്കുള്ള അംഗീകാരം തന്നെയാണ് തേടിയെത്തിയത്. ചേട്ടന്റെ അഭിനയവും ഇഷ്ടമാണെന്നുമായിരുന്നു ആരാധകര്‍ പറഞ്ഞത്.