അഞ്ചു വർഷത്തിലധികമായി ഒരു ഡോക്ടറുമായി പ്രണയത്തിലാണ്; നല്ലൊരു സംവിധായകന്റെ ഒപ്പവും, നല്ലൊരു നായകന്റെ ഒപ്പവും, അത്യാവശ്യം നല്ലൊരു കഥാപാത്രം ചെയ്യണം; പ്രിയപ്പെട്ടവളെ കുറിച്ചും ആഗ്രഹങ്ങളെക്കുറിച്ചും നൂബിന്‍ ജോണി!

മോഡലിംഗില്‍ തിളങ്ങാനുള്ള ആഗ്രഹവുമായി ക്യാമെറയ്ക്ക് മുന്നിലെത്തി ഇന്ന് കുടുംബപ്രേക്ഷകരുടെ പ്രിയങ്കരനായ നായകനാണ് നൂബിന്‍ ജോണി. കുടുംബവിളക്കെന്ന പരമ്പരയില്‍ പ്രതീഷ് മേനോനായെത്തിയാണ് കുടുംബസദസ്സുകളുടെ പ്രിയങ്കരനായി നൂബിൻ മാറുന്നത്. അമ്മയ്‌ക്കൊപ്പം അമ്മയുടെ മനസ്സറിഞ്ഞ് പ്രവര്‍ത്തിക്കുന്ന മകനാണ് പ്രതീഷ്.

മികച്ച പിന്തുണയാണ് പ്രതീഷിന്റെ കഥാപാത്രത്തിന് ലഭിച്ചു കൊണ്ടിരിക്കുന്നത്. ‘അമ്മ മനസ്സുകളുടെ എല്ലാം ഹൃദയം കീഴടക്കിയ പ്രതീഷ് മുൻപേ മിനി സ്‌ക്രീനിൽ എത്തിയിരുന്നു എങ്കിലും കരിയിറിൽ വഴിത്തിരിവായ കഥാപാത്രത്തെ സമ്മാനിച്ചത് കുടുംബവിളക്കാണ്. ഇപ്പോഴിതാ അഭിനയ മേഖലയിലേക്ക് എത്തിയതിനെക്കുറിച്ചും കുടുംബ വിശേഷങ്ങളെക്കുറിച്ചും തുറന്നുപറയുകയാണ് നടൻ.

മോഡലാകാനാണ് ആഗ്രഹിച്ചതെങ്കിലും അഭിനേതാവാനുള്ള അവസരമായിരുന്നു പ്രതീഷിന് ലഭിച്ചത്. മോഡലിംഗിലെ അവസരങ്ങള്‍ പ്രയോജനപ്പെടുത്തുന്നതിന്റെ ഇടയിലാണ് വിദേശത്തേക്ക് ജോലിക്കായി പ്രതീഷ് പോകുന്നത്. തിരിച്ച് വന്നപ്പോഴായിരുന്നു അഭിനയിക്കാനുള്ള അവസരം നൂബിന് ലഭിക്കുന്നത്.

നൂബിനും പ്രതീഷും തമ്മില്‍ ചില സാമ്യങ്ങളുണ്ട്. അമ്മയെ പ്രാണനായി കരുതുന്ന, മുന്‍കോപിയായ കഥാപാത്രമാണ് പ്രതീഷ്. വീട്ടില്‍ ഏറ്റവും അടുപ്പം അമ്മയോടാണ്. അഭിനയമേഖലയിൽ എത്തും എന്ന് ഒരിക്കലും പ്രതീക്ഷിച്ചിരുന്ന ഒരാളല്ല താനെന്നും പ്രതീഷ് പറയുന്നു.

ഒട്ടും പ്രതീക്ഷിക്കാതെയാണ് ഇതിലേക്ക് എത്തുന്നത്. കാരണം എന്റെ വീട് മൂന്നാറിൽ ആണ്. പണ്ടൊക്കെ ഈ മേഖലയിലേക്ക് വരിക എന്ന് പറയുന്നത് വലിയ പ്രയാസമുള്ള കാര്യമായിരുന്നു. ഏതെങ്കിലും ഒരു വർക്ക് വന്നാൽ അതിന്റെ ഓഡിഷൻ നടക്കുന്നത് തിരുവനന്തപുരം, എറണാകുളം തുടങ്ങിയ സ്ഥലങ്ങളിൽ ആയിരുന്നു. അങ്ങനെ ഞാൻ ആദ്യമായി എത്തിയത് മോഡലിങ്ങിലാണ്.

സുഹൃത്തുവഴിയാണ് സീരിയൽ മേഖലയിലേക്ക് എത്തിയത്. സ്വാതി നക്ഷത്രം ചോതിക്ക് ശേഷമാണു കുടുംബവിളക്കിലേക്കുള്ള ക്ഷണം കിട്ടിയത്. അവസരങ്ങൾക്കായി തേടി അലയേണ്ട അവസ്ഥ ഉണ്ടായിട്ടില്ല. ഇനിയിപ്പോ ഭാവിയിൽ എങ്ങനെയാണു എന്ന് അറിയില്ല. എന്നാൽ സിനിമക്ക് വേണ്ടി ഞാൻ അവസരങ്ങൾ തേടുന്നുണ്ട്. സിനിമയാണ് സ്വപ്നവും ലക്ഷ്യവും.

സീരിയലും എനിക്ക് സിനിമ പോലെ ഇഷ്ടമാണ്. സിനിമയിലേക്കുള്ള ഒരു ചവിട്ടുപടികൂടിയാണ് സീരിയൽ മേഖല. പക്ഷേ എന്റെ പ്രധാന ലക്ഷ്യം സിനിമയാണ് എന്നുമാത്രം. ചില ഓഫറുകൾ വന്നിരുന്നു, പക്ഷെ അതൊക്കെ ചെറിയ സിനിമകൾ ആയിരുന്നു. നമ്മൾ കാത്തിരുന്ന് അവസരങ്ങൾ എത്തുമ്പോൾ, നല്ലൊരു സംവിധായകന്റെ ഒപ്പവും, നല്ലൊരു നായകന്റെ ഒപ്പവും, അത്യാവശ്യം നല്ലൊരു കഥാപാത്രം ചെയ്യണം എന്നാണ് എന്റെ ആഗ്രഹം. അതിനായുള്ള പരിശ്രമത്തിലാണ് ഞാൻ ഇപ്പോൾ.

കുടുംബവിളക്കിലെ പ്രതീഷ് തീർച്ചയായും നല്ല മാറ്റങ്ങൾ കരിയറിലും ജീവിതത്തിലും വരുത്തി. ഒരു പോസിറ്റീവ് കഥാപാത്രം ആയതുകൊണ്ടുതന്നെ എവിടെ പോയാലും പോസിറ്റീവ് ആയ അഭിപ്രായങ്ങൾ ആണ് ലഭിക്കുന്നത്.

മാത്രമല്ല പരമ്പരയിലെ സംവിധായകൻ ഉൾപ്പെടെയുള്ള എല്ലാ ആളുകളും നല്ല പിന്തുണയാണ് നൽകുന്നത്. റേറ്റിങ്ങിലും മുൻപന്തിയിൽ പോകുന്നതിൽ ഒരുപാട് സന്തോഷമുണ്ട്. പ്രൊഡക്ഷൻ കൺട്രോളർ ജോസേട്ടൻ വഴിയാണ് എനിക്ക് അവസരം തുറന്നുകിട്ടിയത്.

ഇടുക്കി ജില്ലയിലെ രാജാക്കാട് ആണ് വീട്. അച്ഛനും അമ്മയും സഹോദരനും അടങ്ങുന്ന കൊച്ചു കുടുംബം. എന്റെ ആഗ്രഹങ്ങൾക്ക് ഒപ്പമാണ് അവരെന്നും പൂർണ്ണ പിന്തുണയാണ് അവരുടെ ഭാഗത്തുനിന്നും ലഭിക്കുന്നത് അത് തന്നെയാണ് എന്റെ ബലവും.

വിവാഹം ഉടനെ ഇല്ല ഏകദേശം ഒരു വർഷം കഴിഞ്ഞേ വിവാഹം ഉണ്ടാകൂ പ്രണയവിവാഹം ആയിരിക്കും. ഒരു അഞ്ച് അഞ്ചര വര്ഷമായുള്ള ബന്ധമാണ്. ബാക്കി വിശേഷങ്ങൾ ഒക്കെ വിവാഹം എത്തുമ്പോൾ പറയാം. ആള് ഡോക്ടർ ആണ്, എന്റെ കുടുംബത്തെ പോലെ തന്നെ എന്റെ ആഗ്രഹങ്ങൾക്കും ഇഷ്ടങ്ങൾക്കും, സിനിമാമോഹങ്ങൾക്കും ഒപ്പം നിൽക്കുന്ന ആളാണ് കക്ഷി.

about noobin