നിന്നോടുള്ള സ്‌നേഹം വാക്കുകള്‍ക്കപ്പുറം; നിന്റെ ഓര്‍മകള്‍ ഞങ്ങളുടെ ഹൃദയത്തില്‍ കൊത്തിവച്ചിരിക്കുന്നു; മകളുടെ ഓർമ്മ ദിനത്തിൽ ചിത്ര

മകൾ നന്ദനയുടെ വിയോഗത്തിലൂടെയാണ് ചിത്ര എന്ന ഗായിക ആദ്യമായി തളരുന്നത്. സംഗീത ലോകത്തേക്ക് ഇനിയൊരു തിരിച്ചുവരവ്‌ ഇല്ല എന്നായിരുന്നു വിചാരിച്ചിരുന്നത്. എന്നാല്‍ ആരാധകരുടെയും കുടുംബത്തിന്റെയും പൂര്‍ണ്ണ പിന്തുണയോടെ ദൈവത്തിന്റെ അനുഗ്രഹം കൊണ്ട് ചിത്ര തിരിച്ചുവരുകയായിരുന്നു

ഇപ്പൊൾ ഇതാ മകള്‍ നന്ദനയുടെ ഓര്‍മ ദിനത്തില്‍ ഹൃദയസ്പര്‍ശിയായ കുറിപ്പ് പങ്കുവെച്ചിരിക്കുകയാണ് ചിത്ര. മകളുടെ ഓര്‍മകള്‍ ഇന്നും നിധി പോലെ സൂക്ഷിക്കുകയാണെന്നും ഒരുപാട് മിസ് ചെയ്യുന്നുണ്ടെന്നും ഗായിക കുറിച്ചു. പത്ത് വര്‍ഷം മുമ്പാണ് നന്ദനയെ ചിത്രയ്ക്ക് നഷ്ടമാവുന്നത്.

”നിന്റെ ജനനം ആയിരുന്നു ഞങ്ങള്‍ക്ക് ജീവിതത്തില്‍ ലഭിച്ച ഏറ്റവും വലിയ അനുഗ്രഹം. നിന്റെ ഓര്‍മകള്‍ ഞങ്ങള്‍ക്കെന്നും നിധി പോലെയാണ്. നിന്നോടുള്ള സ്‌നേഹം വാക്കുകള്‍ക്കപ്പുറമാണ്. നിന്റെ ഓര്‍മകള്‍ ഞങ്ങളുടെ ഹൃദയത്തില്‍ കൊത്തിവച്ചിരിക്കുന്നു. അത് എന്നേയ്ക്കും നിലനില്‍ക്കുകയും ചെയ്യും.”

”ഒരു വേള എങ്കിലും നിന്നെ കാണാന്‍ ഞങ്ങള്‍ ആഗ്രഹിക്കുന്നു. നീ ഞങ്ങള്‍ക്ക് എത്രമാത്രം വിലപ്പെട്ടതാണെന്ന് ആ നിമിഷം ഞങ്ങള്‍ക്കു നിന്നോടു പറയണം. പ്രിയ നന്ദന, നിന്നെ ഒരുപാട് മിസ് ചെയ്യുന്നു” എന്നാണ് മകളുടെ ചിത്രം പങ്കുവച്ചു കൊണ്ട് ചിത്ര കുറിച്ചിരിക്കുന്നത്.

വിവാഹം കഴിഞ്ഞ് ഏറെ നാളത്തെ കാത്തിരിപ്പിനൊടുവിലാണ് 2002ല്‍ ചിത്രയ്ക്കും ഭര്‍ത്താവ് വിജയ്ശങ്കറിനും നന്ദന ജനിക്കുന്നത്. 2011ല്‍ ഒരു വിഷു ദിനത്തിലാണ് നന്ദന ദുബായിയില്‍ വച്ച് നീന്തല്‍ക്കുളത്തില്‍ വീണ് മരിക്കുന്നത്. എട്ടു വയസ്സായിരുന്നു അന്ന് നന്ദനയ്ക്ക്. മകളുടെ വിയോഗത്തിന്റെ ആഘാതത്തില്‍ കഴിഞ്ഞ ചിത്ര ചെറിയൊരു ഇടവേളയ്ക്ക് ശേഷമാണ് വീണ്ടും റെക്കോഡിങ്ങിനെത്തിയത്.