പുകച്ചു പുറത്തു ചാടിച്ചതിനാല്‍ കയ്യില്‍ കിട്ടിയതൊക്കെ എടുത്ത് ഇന്നലെ ഓടി രക്ഷപ്പെടുകയായിരുന്നു; മാപ്പ് പറഞ്ഞ് ലക്ഷ്മി പ്രിയ

മിനിസ്‌ക്രീന്‍ പ്രേക്ഷകര്‍ക്കും ബിഗ് സ്‌ക്രീന്‍ പ്രേക്ഷകര്‍ക്കുമേറെ പ്രിയങ്കരിയായി മാറിയ നടിയാണ് ലക്ഷ്മി പ്രിയ. ബിഗ്‌ബോസ് മലയാളം സീസണ്‍ നാലിലും താരം പങ്കെടുത്തിരുന്നു. സോഷ്യല്‍ മീഡിയയില്‍ വളരെ സജീവമായ താരം ഇടയ്ക്കിടെ തന്റെ ചിത്രങ്ങളും വിശേഷങ്ങളുമെല്ലാം തന്നെ പങ്കുവെച്ച് എത്താറുണ്ട്. അവയെല്ലാം തന്നെ വളരെപ്പെട്ടെന്നാണ് വൈറലായി മാറുന്നത്.

ഇപ്പോഴിതാ തന്റെ 38ാം പിറന്നാള്‍ ദിനത്തില്‍ ലക്ഷ്മി പങ്കുവെച്ച കുറിപ്പാണ് ശ്രദ്ധ നേടുന്നത്. അഴിയ്ക്കും തോറും കൂടുതല്‍ കൂടുതല്‍ കുരുങ്ങിപ്പോകുന്ന കുരുക്കാണ് ജീവിതം എങ്കിലും മനോഹരമാണെന്നാണ് ലക്ഷ്മി പ്രിയ പറയുന്നത്.

ലക്ഷ്മി പ്രിയയുടെ കുറിപ്പിന്റെ പൂര്‍ണ രൂപം ഇങ്ങനെ;

മുപ്പത്തിയെട്ട് മനോഹര വര്‍ഷങ്ങള്‍ ഞാനീ ഭൂമിയില്‍ പൂര്‍ത്തിയാക്കിയിരിക്കുന്നു. അഴിക്കുന്തോറും കൂടുതല്‍ കൂടുതല്‍ കുരുങ്ങിപ്പോകുന്ന കുരുക്കാണ് ജീവിതം എങ്കിലും ജീവിതം മനോഹരമാണ്. ഇതില്‍ ഏറ്റവും നന്ദിയുള്ളത് പിന്നീടുള്ള ജീവിതത്തില്‍ മുതല്‍ക്കൂട്ടാക്കുവാന്‍ ഭാഗ്യമില്ലാതെ പോയി എങ്കിലും ജന്മം തന്ന മാതാപിതാക്കന്‍മാരോട് തന്നെയാണ്. റ്റാറ്റായോട്, ഗുരുക്കന്‍മാരോട്, 20 വര്‍ഷമായി ചേര്‍ത്തു പിടിയ്ക്കുന്ന ജയേഷേട്ടനോട്, ഈ ഭൂമിയിലെ ഏറ്റവും വലിയ സമ്മാനമായ മകളോട്, പിന്നെ എന്നെ സ്‌നേഹിക്കുന്ന നിങ്ങളോരോരുത്തരോടും.

കാരണം, ബിഗ് ബോസ് സീസണ്‍ 4 പോലെ ഒരു വലിയ റിയാലിറ്റി ഷോയില്‍ യാതൊരു പിആര്‍വര്‍ക്ക് ന്റേയും പിന്‍ബലം ഇല്ലാതെ യാതൊരു ആര്‍മി ഗ്രൂപ്പും എന്തിന് ഇന്‍സ്റ്റാഗ്രാമില്‍ മര്യാദയ്ക്ക് ഒരു പേജ് പോലും ഇല്ലാതിരുന്നിട്ടും, ഒരു തവണ പോലും ബിഗ് ബോസ് വീടിന്റെ ക്യാപ്റ്റന്‍ ആകാതെ ഇരുന്നിട്ടും (ക്യാപ്റ്റന്‍ ആയാല്‍ ഒരാഴ്ച എലിമിനേഷനില്‍ വരില്ലല്ലോ) ഞാന്‍ 100 ദിവസം ആ ഷോയില്‍ നിന്നു എങ്കില്‍ അഞ്ചാം സ്ഥാനം ആഗ്രഹിച്ച ഞാന്‍ നാലാം സ്ഥാനം കരസ്ഥമാക്കി എങ്കില്‍ അത് എന്റെ പ്രിയപ്പെട്ടവരേ നിങ്ങള്‍ നല്‍കിയ സ്‌നേഹം കൊണ്ടു മാത്രമാണ്.

തിരിച്ചും നിറഞ്ഞ സ്‌നേഹം. ഈ ഭൂമിയില്‍ ഏറ്റവും പ്രണയം ഈ പ്രകൃതിയോട് തന്നെയാണ്. ഈ പ്രകൃതി ഇല്ലെങ്കില്‍ നാമില്ല! തലമുറയില്ല. എന്റെ ജന്മനക്ഷത്രം മകയിരമാണ്. കഴിഞ്ഞയാഴ്ചയായിരുന്നു പിറന്നാള്‍. അന്ന് കാക്കനാട് ചില്‍ഡ്രന്‍സ് ഹോമില്‍ ഭൂമി ഫൗണ്ടേഷനുമായി ചേര്‍ന്ന് പ്ലാവിന്‍ തൈ നട്ടിരുന്നു. അന്ന് കുഞ്ഞുങ്ങള്‍ക്ക് വാക്ക് കൊടുത്തിരുന്നു.

ഇന്ന് കേക്കുമായി വരാം എന്നും ഒരുമിച്ച് ആഘോഷിക്കാമെന്നും. പുകച്ചു പുറത്തു ചാടിച്ചതിനാല്‍ കയ്യില്‍ കിട്ടിയതൊക്കെ എടുത്ത് ഇന്നലെ ഓടി രക്ഷപ്പെടുകയായിരുന്നു. കാത്തിരിക്കുന്ന മായക്കുട്ടി അടക്കമുള്ള 27 കുഞ്ഞുങ്ങളോടും മാപ്പ് പറയുന്നു. അടുത്ത ശനിയാഴ്ച അവിടുത്തെ കുഞ്ഞുങ്ങളുമായി ചേര്‍ന്ന് മാത്രമേ പിറന്നാള്‍ ആഘോഷിക്കുകയുള്ളൂ. എല്ലാവരുടെയും സ്‌നേഹത്തിനും പിന്തുണയ്ക്കും ഒരിക്കല്‍ കൂടി നന്ദി.