പ്രസംഗത്തിനിടെ ആ പ്രശസ്ത നടൻ എന്റെ വണ്ണത്തെ കളിയാക്കാൻ തുടങ്ങി. എല്ലാവരും ചിരിച്ചു. എനിക്കത് വലിയ സങ്കടമായി; അശ്വതി

മലയാള മിനിസ്ക്രീൻ പ്രേക്ഷർക്കേറെ സുപരിചിതയാണ് നടി അശ്വതി. സോഷ്യൽ മീഡിയയിൽ വളരെ സജീവമായ താരം പങ്കുവെയ്ക്കാരുള്ള പോസ്റ്റുകളെല്ലാം വളരെപ്പെട്ടെന്നാണ് വൈറലായി മാറുന്നത്. സീരിയൽ രംഗത്ത് തിളങ്ങി നിൽക്കുമ്പോഴാണ് അശ്വതി ഇടവേളയെടുക്കുന്നത്. ഒരിടയ്ക്ക് ശേഷം അഭിനയത്തിൽ വീണ്ടും സജീവമായി മാറിയിരിക്കുകയാണ് അശ്വതി. ഇപ്പോൾ സുസുവിലെ ലക്ഷ്മിയായി കോമഡിയിലും കയ്യടി നേടുന്നുണ്ട് അശ്വതി.

ബിഗ് ബോസ് കാലത്തെ അശ്വതിയുടെ കുറിപ്പുകൾ വൈറലായിരുന്നു. തന്റെ മേക്കോവറിലൂടേയും അശ്വതി സോഷ്യൽ മീഡിയയുടെ കയ്യടി നേടിയിരുന്നു. അതേസമയം തനിക്ക് കടുത്ത ബോഡി ഷെയ്മിംഗ് നേരിടേണ്ടി വന്നിട്ടുണ്ടെന്നാണ് അശ്വതി പറയുന്നത്. ഒരു പരിപാടിയിൽ വച്ച് പ്രമുഖ നടനിൽ നിന്നുള്ള അപമാനത്തെക്കുറിച്ചും ബോഡി ഷെയ്മിംഗിനെക്കുറിച്ചും സംസാരിക്കുകയാണ് അശ്വതി.

ഒരു മാഗസീനിന് നൽകിയ അഭിമുഖത്തിലാണ് താരം സംസാരിക്കുന്നത്. കടുത്ത ബോഡി ഷെയ്മിംഗുകൾ സോഷ്യൽ മീഡിയയിൽ നിന്നും തനിക്ക് നേരിടേണ്ടി വന്നിട്ടുണ്ടെന്നാണ് അശ്വതി പറയുന്നത്. അന്ന് തന്നെ അപമാനിച്ച നടനെ പിന്നെ കണ്ടപ്പോഴുള്ള അനുഭവവും അഭിമുഖത്തിൽ അശ്വതി പങ്കുവെക്കുന്നുണ്ട്.

കുടുംബത്തോടൊപ്പം ദുബായിലായിരുന്നു. കല്യാണം കഴിഞ്ഞാണ് കുങ്കുമപ്പൂവ് ചെയ്തത്. അതിനിടെ മോൾ ജനിച്ചു. അതിന് ശേഷം മനസ്സറിയാതെയിൽ അഭിനയിച്ചു. അപ്പോഴേക്കും രണ്ടാമത്തെ കുഞ്ഞായി. അവരുടെ കാര്യത്തിൽ കൂടുതൽ ശ്രദ്ധിക്കാനാണ് 2015ൽ സീരിയൽ വിട്ടതെന്നാണ് അശ്വതി പറയുന്നത്. സീരിയൽ വിട്ടുവെങ്കിലും ഷോർട്ട് ഫിലിമുകളിൽ അഭിനയിക്കുകയും വിജെയായി ജോലി ചെയ്യുകയും ചെയ്തിരുന്നു അശ്വതി. ഈ സമയത്താണ് വണ്ണം കൂടുന്നത്.

ദുബായിൽ ചെന്നു കുറച്ചുകാലം കഴിഞ്ഞപ്പോഴേ ശരീരഭാരം കൂടി. നന്നായി തടി വച്ചു. ഞാനൊരു ഭക്ഷണപ്രേമിയാണ്. രുചികരമായ ഭക്ഷണം കിട്ടിയാൽ ആദ്യം അതിന്റെ മണം ആസ്വദിക്കും. ശേഷം മനസും വയറും നിറയും വരെ ഇഷ്ടത്തോടെ കഴിക്കും. ഇതിനിടെ സോഷ്യൽ മീഡിയയിലെ എന്റെ ഫോട്ടോസിന് താഴെ പലരും കടുത്ത ബോഡി ഷെയ്മിങ് തുടങ്ങിയിരുന്നു. മാത്രമല്ല ഡ്രസിന്റെ അളവ് 4 എക്‌സ് എൽ വരെയായി. ഇഷ്ടപ്പെട്ട വസ്ത്രം വാങ്ങാൻ പോകുമ്പോൾ സൈസ് കൃത്യമായി കിട്ടുന്നില്ലെന്ന അവസ്ഥയായി എന്നാണ് അശ്വതി പറയുന്നത്.

ഇതിനിടെ വിഷമം തോന്നിയൊരു സംഭവമുണ്ടായി. ദുബായിൽ ഒരുപാടിയിൽ പ്രശസ്ത നടനും ഞാനുമായിരുന്നു അതിഥികളായി പങ്കെടുത്തത്. വേറെ വിഷയങ്ങളൊന്നും കിട്ടാത്തതിനാലാകാം പ്രസംഗത്തിനിടെ അദ്ദേഹം എന്റെ വണ്ണത്തെ കളിയാക്കാൻ തുടങ്ങി. എല്ലാവരും ചിരിച്ചു. എനിക്കത് വലിയ സങ്കടമായി. പക്ഷെ അപ്പോൾ പ്രതികരിച്ചില്ല. നമ്മൾ കാരണം ഒരു ചടങ്ങ് അലങ്കോലമാകണ്ടല്ലോ എന്നു തോന്നി എന്നാണ് അശ്വതി പറയുന്നത്.

ആ നടനോടുള്ള തന്റെ മധുരപ്രതികാരവും അശ്വതി പങ്കുവെയ്ക്കുന്നുണ്ട്. അടുത്തിടെ വീണ്ടും ആ നടനെ കണ്ടപ്പോൾ ഇപ്പോൾ എന്ത് പറയുന്നു ചേട്ടാ എന്ന് താൻ ചോദിച്ചുവെന്നും പുള്ളി ചമ്മിയ ഒരു ചിരി ചിരിച്ചുവെന്നുമാണ് അശ്വതി പറയുന്നത്. താൻ ഭാരം കുറച്ചത് എങ്ങനെയെന്നും താരം പറയുന്നുണ്ട്. കളിയാക്കലുകൾ മാനസികമായി വിഷമമുണ്ടാക്കിയെങ്കിലും ഭാരം കുറയ്ക്കണമെന്ന് തോന്നിയത് ആരോഗ്യ പ്രശ്‌നങ്ങൾ തുടങ്ങിയപ്പോഴാണെന്നുമാണ് അശ്വതി പറയുന്നത്.

അൽപ്പം നടക്കുമ്പോഴേ കിതയ്ക്കാനും നടു വേദനിക്കാനുമൊക്കെ തുടങ്ങിയിരുന്നുവെന്നാണ് അശ്വതി ഓർക്കുന്നത്. 2019 ഒക്ടോബറിൽ ഡയറ്റ് തുടങ്ങി. ഒപ്പം വ്യായാമവും ചെയ്തിരുന്നു. രണ്ടിലും വീട്ടുവീഴ്ച ചെയ്തില്ല. അങ്ങനെ ആഴ്ചകൾ കഴിഞ്ഞപ്പോഴേക്ക് ഫലം കണ്ടു തുടങ്ങിയെന്നും താരം പറയുന്നുണ്ട്. മാസങ്ങൾക്കകം ഭാരം നൂറിൽ നിന്നും 35 കിലോ കുറച്ചുവെന്നാണ് അശ്വതി പറയുന്നത്.