News
തലച്ചോറില്‍ രക്തം കട്ടപിടിച്ചു, ഒന്നിലേറെ ഹൃദയാഘാതം; നടി ഐന്ദ്രില ശര്‍മയുടെ ആരോഗ്യനില ഗുരുതരം
തലച്ചോറില്‍ രക്തം കട്ടപിടിച്ചു, ഒന്നിലേറെ ഹൃദയാഘാതം; നടി ഐന്ദ്രില ശര്‍മയുടെ ആരോഗ്യനില ഗുരുതരം
നടി ഐന്ദ്രില ശര്‍മയുടെ ആരോഗ്യനില ഗുരുതരം. പക്ഷാഘാതത്തെ തുടർന്നാണ് നടിയെ കൊൽക്കത്തയിലെ ആശുപത്രിയിൽ പ്രവേശിപ്പിച്ചത്. നടിക്ക് ചൊവ്വാഴ്ച ഒന്നിലേറെ ഹൃദയാഘാതങ്ങളുണ്ടായതായി ദേശീയ മാധ്യമങ്ങൾ റിപ്പോർട്ട് ചെയ്തു.
പക്ഷാഘാതമുണ്ടായതിനെ തുടര്‍ന്ന് ഐന്ദ്രിലയെ സര്‍ജറിക്ക് വിധേയയാക്കിയിരുന്നു.വെന്റിലേറ്ററിലാണ് അവർ ഇപ്പോഴുള്ളത്
തലച്ചോറില്‍ രക്തം കട്ടപിടിച്ചിരിക്കുകയാണ് എന്നാണ് പുതിയ സി.ടി. സ്‌കാന്‍ റിപ്പോര്‍ട്ട് സൂചിപ്പിക്കുന്നത്. ഇത് നീക്കം ചെയ്യുന്നത് സാധ്യമല്ല എന്നാണ് ഡോക്ടര്‍മാര്‍ അറിയിച്ചിരിക്കുന്നത്. രക്തം കട്ടപിടിച്ചത് കുറയാനുള്ള പുതിയ മരുന്ന് നല്‍കിയിട്ടുണ്ടെന്നും ഇതിനോട് ഐന്ദ്രില എങ്ങനെ പ്രതികരിക്കുന്നുവെന്ന് അറിയണമെന്നും ഡോക്ടര്‍മാര്‍ പറഞ്ഞു.
രണ്ട് തവണ അര്‍ബുദത്തെ അതിജീവിച്ച താരമാണ് ഐന്ദ്രില. ഝുമുര്‍ പരിപാടിയിലൂടെ ടിവിയില്‍ അരങ്ങേറ്റം കുറിച്ച അവര്‍ ജിബോണ്‍ ജ്യോതി, ജിയോന്‍ കത്തി തുടങ്ങിയ ഷോകളില്‍ എത്തിയിരുന്നു. ഒരദ്ഭുതം സംഭവിക്കാന്‍ പ്രാര്‍ത്ഥിക്കണം എന്നാണ് ഐന്ദ്രിലയുടെ സുഹൃത്തും നടനുമായ സബ്യസാചി ചൗധരി പറയുന്നത്.
”ഇത് ഇവിടെ എഴുതുമെന്ന് ഞാന്‍ ഒരിക്കലും കരുതിയിരുന്നില്ല. എന്നിരുന്നാലും, ഇന്നാണ് ദിവസം. ഐന്ദ്രിലയ്ക്ക് വേണ്ടി പ്രാര്‍ത്ഥിക്കുക. ഒരു അത്ഭുതത്തിനായി പ്രാര്‍ത്ഥിക്കുക. അമാനുഷികതയ്ക്കായി പ്രാര്‍ത്ഥിക്കുക” എന്നാണ് സബ്യസാചി ചൗധരി സോഷ്യല്‍ മീഡിയയില്‍ കുറിച്ചിരിക്കുന്നത്.
