ചലച്ചിത്ര നിർമാതാവ് കൃഷൻ കുമാറിന്റെ മകൾ തിഷാ കുമാർ അന്തരിച്ചു

പ്രശസ്ത ബോളിവുഡ് ചലച്ചിത്ര നിർമാതാവ് കൃഷൻ കുമാറിന്റെ മകൾ തിഷാ കുമാർ അന്തരിച്ചു. ഇരുപത് വയസായിരുന്നു പ്രായം. 21-ാം ജന്മദിനത്തിന് രണ്ട് മാസമ മാത്രം അവശേഷിക്കെയാണ് മരണം സംഭവിച്ചത്. കാൻസർ ബാധിച്ചതിനെ തുടർന്ന ദീർഘനാളായി ചികിത്സയിലായിരുന്നു തിഷാ. ജർമനിയിൽ ചികിത്സയിലിരിക്കേയാണ് അന്ത്യം.

തിഷയുടെ അപ്രതീക്ഷിത മരണത്തിന്റെ വേദനയിൽ കുടുംബം കടുത്ത പ്രതിസന്ധിയിലൂടെയും ദുഃഖത്തിലൂടെയും ആണ് കടന്നു പോകുന്നത്. ദയവായി കുടുംബത്തിന്റെ സ്വകാര്യതയെ മാനിക്കണമെന്ന് അപേക്ഷിക്കുന്നുവെന്ന് കൃഷൻ കുമാറിന്റെ വക്താവ് അറിയിച്ചു.

സന്ദീപ് റെഡ്ഡി വാംഗ സംവിധാനം ചെയ്ത് വിവാദങ്ങൾ സൃഷ്ടിച്ച അനിമൽ എന്ന രൺബീർ കപൂർ സിനിമയുടെ പ്രീമിയറിന് തിഷാ കുടുംബത്തോടൊപ്പം പങ്കെടുത്തിരുന്നു. ആ ചിത്രങ്ങളെല്ലാം വൈറലായിരുന്നു. ഈ പരിപാടിയ്ക്ക് ശേഷം പൊതുവേദികളിൽ തിഷാ എത്തിയിരുന്നില്ല.

ടി സീരിസ് സ്ഥാപകൻ ഗുൽഷൻ കുമാറിന്റെ സഹോദരനാണ് കൃഷൻ കുമാർ. ഗുൽഷൻ കുമാർ കൊ ല്ലപ്പെട്ടതിന് ശേഷം അദ്ദേഹത്തിന്റെ മകൻ ഭൂഷൺ കുമാറിനൊപ്പം നിൽക്കുകയും ടി സീരീസിന്റെ വളർച്ചയ്ക്ക് കരുത്തുപകരുകയും ചെയ്ത വ്യക്തി കൂടിയാണ് കൃഷൻ കുമാർ.

നടിയായിരുന്ന ടാന്യ സിംഗ് ആണ് കൃഷന്റെ ഭാര്യ. ഇവരുടെ ഏക മകളാണ് തിഷ. തിഷയുടെ മര ണത്തിൽ സിനിമാപ്രവർത്തകരും സുഹൃത്തുക്കളും അനുശോചനം അറിയിച്ചിട്ടുണ്ട്.